La presencia del asturianu na cartelería del aeropuertu d’Asturies y l’usu de la toponimia oficial son dalgunes de les reclamaciones qu’Iniciativa pol Asturianu fixo llegar a la empresa Aeropuertos Españoles y Navegación Aérea (AENA). La entidá rexistró una solicitú pa incorporar la llingua asturiana na cartelería ya informaciones o llocuciones del espaciu d’aviación.
La presencia del idioma permitiría da-y normalidá, visibilidá y reconocimientu a la llingua asturiana a les persones que lleguen a Asturies. D’esta manera, l’idioma s’alcontraría en condiciones d’igualdá respeuto al restu de llingües cooficiales. La organización de reivindicación llingüística recuerda que yá hai casos d’idiomes, como l’inglés y l’alemán, que nun siendo oficiales n’España sí tan presentes na cartelería de dellos aeropuertos.
Iniciativa pol Asturianu recuerda qu’anque la llingua asturiana entá nun seya oficial ta reconocía nel Estatutu d’Autonomía del Principáu d’Asturies y la propia Constitución Española reconoz, nel so artículu 3, que la riqueza de les distintes modalidaes llingüístiques d’España ye un patrimoniu cultural que será oxetu d’especial respetu y protección.
Al traviés d’un pidimientu dirixíu a AENA, la organización solicita al organismu que nes campañes informatives que s’entamen dende l’aeropuertu d’Asturies y nes bienllegaes a los turistes tea presente tamién la llingua asturiana.
