Iniciativa pol Asturianu califica de decepcionante la propuesta d’articuláu pal mandatu-marcu de la Radiotelevisión del Principáu d’Asturies (RTPA) y considera que d’aprobase va condergar a les llingües propies a una presencia probetaya nos medios públicos de comunicación. La entidá llamenta que la cuestión llingüística quede nun papel totalmente secundariu qu’afíta que’l serviciu públicu audiovisual autonómicu ye en castellanu. El documentu nun reconoz al asturianu y l’eonaviego como llingües vehiculares, lo que va arrequexar la so presencia na parrilla a programes sueltos como hasta agora.
Angüaño la programación n’asturianu ye mínima, con repeticiones constantes y ensin apenes conteníos nuevos. Nel casu del eonaviego ye directamente inesistente. L’asociación insiste en que les llingües propies han ser un pegoyu fundamental de la radiotelevisión pública asturiana polo que ve incomprensible que la cuestión llingüística quede arrequexada ente los oxetivos xenerales marcaos. «Resulta sorprendente que la mesma Xunta Xeneral que va una selmana votó de forma mayoritaria a favor de la oficialidá faiga de menos les llingües propies nel mandatu-marcu de la RTPA. Ye’l momentu de valorar el potencial normalizador de los medios públicos y d’apostar por una presencia digna de dambos idiomes na so programación», apunten dende Iniciativa pol Asturianu.
Asinamesmo, la entidá recuerda que la Llei d’Usu ampara l’apueste pol idioma nos medios públicos. Nel so artículu 13, la normativa avala que «nes emisiones de radio y televisión y nos demás medios de comunicación con presencia actual o futura de la Administración autonómica, ésta velará por una presencia adecuada del asturianu».
Iniciativa pol Asturianu echa en falta que’l mandatu-marcu nun faiga referencia a la discriminación llingüística y propón una redacción nueva pal artículu 10 del documentu, qu’afite l’usu del asturianu y l’eonaviego como «llingües vehiculares». L’asociación recuerda que yá fizo llegar les sos propuestes a los grupos parlamentarios de la Xunta Xeneral nel mes de payares, coincidiendo cola celebración del Día Mundial de la Televisión. Ente los plantegamientos de la entidá inclúinse la de convertir la Radio del Principáu d’Asturies (RPA) nuna emisora 100% n’asturianu, incentivar la publicidá nes llingües propies y la emisión d’informativos diarios n’asturianu cola mesma duración que los que s’emiten en castellán.
La organización considera que ye fundamental cuntar con una ufierta moderna y atractiva, con especial atención a la reciella, pa dar sentíu a los medios públicos como motor pa la tresmisión xeneracional.
