Iniciativa pol Asturianu reclama coherencia al equipu de gobiernu uvieín pol usu del asturianu nel conceyu. La llingua propia ye ún de los exes vertebradores de la campaña de la candidatura a Capital Europea de la Cultura nel añu 2031 col lema ‘Puxa Europa. The future is now’. Na so presentación, el xefe del serviciu de comunicación y director del proyectu, Rodolfo Sánchez, valoró la llingua asturiana como un elementu distintivu, arriquecedor y un atractivu cultural. Afirmó tamién que l’asturianu apurría un valir añedíu a la candidatura y qu’Europa premiaba l’usu de les llingües minorizaes nes candidatures.
L’asociación valora la reconocencia del patrimoniu llingüísticu como un aspectu a curiar y reclama al Conceyu d’Uviéu pasos alantre pa que nun queden en pallabres. Iniciativa pol Asturianu recuerda qu’Uviéu nun tien plan de normalización llingüística, serviciu de normalización llingüística nin fai usu de la toponimia oficial.
La entidá recuerda tamién que’l Partíu Popular, que gobierna con mayoría absoluta nel conceyu, presume constantemente de l’aprobación de la Llei d’Usu del Asturianu, pero cuando tien capacidá p’aplicala, como ye’l casu, nun lo fai. «Allegrános esa valoración del asturianu na campaña a la capitalidá pero nun entendemos l’ausencia del idioma na páxina web municipal, nos autobuses urbanos, na cartelería (Antroxu, San Xuan, San Matéu…), etc».
Iniciativa pol Asturianu contactó col director de la campaña pa reconocer la inclusión del asturianu y poles pallabres envalorando’l patrimoniu llingüísticu y reclamó avances nel usu normal y la visibilización del idioma como ocurre en centenares de conceyos de Galicia, Comunidá Valenciana o Baleares, comunidaes con llingua propia que cuenten con gobiernos autonómicos y municipales del PP. La organización de reivindicación llingüística considera que la capital nun pue quedar atrás na normalización social del asturianu. «Ye’l momentu d’aplicar el discursu del Partíu Popular sobre l’asturianu y ser mínimamente coherentes colo que se diz na Xunta Xeneral y nel Plenu d’Uviéu», sentenciaron dende l’asociación.
