XIXÓN, 25/03/2021. Bárbara Biagioli fizo’l so trabayu de fin de grau sobre la llingua asturiana y gracies a esi trabayu, graduóse en Mediación Llingüística na Universidá pa Extranxeros de Siena. Dempués d’esta bona noticia y d’apaecer nuna entrevista nun mediu de comunicación recibiera nes sos cuentes personales en diferentes redes sociales varios mensaxes con ataques y amenaces.
Iniciativa pol Asturianu quier, en primer llugar, treslladar a Bárbara Biagioli el sofitu de la nuesa organización y la condena de tolos ataques que recibiera al traviés de mensaxes en redes sociales únicamente por facer un trabayu d’investigación científica alrodiu del idioma y dar una opinión científica.
Por suerte, estes actitues escontra l’idioma de toos y toes los que vivimos n’Asturies son mínimes na sociedá asturiana que quier convivir n’armonía y llibertá llingüística, ensin esclusiones de nengún tipu, a nadie d’equí nin d’otru territoriu. La sociedá asturiana ye una sociedá integradora, diversa, plural, non escluyente y que quier cuidar el so patrimonio llingüísticu ensin conflictos.
Pa terminar, pa Iniciativa pol Asturianu ye importante felicitar a la italiana Bárbara Biagioli pol so trabayu, por esi cariñu al nuesu idioma, por colaborar a esa dignificación tan necesaria pa la nuesa llingua y tresllada-y el cariñu y el sofitu de tola organización por esos ataques. Estes mínimes actitúes amuesen que tovía queda por facer munchu trabayu y muncha didáctica por facer pa espardir la sensibilidá y diversidá llingüística.
