XIXÓN, 18/03/2021. El Tribunal Constitucional ta acabantes de dictar sentencia sobre’l recursu de Vox escontra la modificación del Reglamentu d’Usu del asturianu na Xunta Xeneral que permitía l’usu llibre del idioma nel parlamentu d’Asturies. Iniciativa pol Asturianu considera “que la sentencia refrendando l’usu del asturianu por tolos comparecientes na cámara reflexa la necesidá de siguir trabayando na normalización social del asturianu, dando pasos pa llograr de manera definitiva una igualdá real”.
El presidente de la organización, Iván Llera, afirmó que “nun ye comprensible oponese a esti Reglamentu d’Usu de la llingua asturiana argumentando que los drechos llingüísticos yá tan reconocíos y al mesmu tiempu intentar torgar y bloquear los avances pa que tolos comparecientes puean usar llibremente l’asturianu y el castellán. Si los drechos tan yá reconocíos y caún pue usar l’idioma que prefiera llibremente, ¿cómo ye posible pretender qu’un diputáu nun pueda interpelar al presidente del Principáu usando l’asturianu?”.
Llera insistió en que “con esta sentencia demuéstrase que les instituciones tienen que siguir dando pasos en tolos ámbitos pa normalizar l’idioma. Queremos consiguir una igualdá de drechos de la ciudadanía independientemente de la llingua que falen y pa ello la única ferramienta ye la oficialidá”.
El presidente de la entidá acabó recordando que va una selmana que’l Congresu de los Diputaos sofitó con 194 votos a favor la demanda de la oficialidá del asturianu. “Ye’l momentu d’iguar esta anomalía constitucional y treslladar esa mayoría y consensu social a la Xunta Xeneral”.
