XIXÓN, 12/03/2021. El presidente d’Iniciativa pol Asturianu, Iván Llera, ya’l vocal de rellaciones institucionales, Inaciu Galán, aconceyaron esti xueves col secretariu xeneral de Podemos Asturies, Daniel Ripa y la conceyala de Podemos Xixón Laura Tuero. Tamién participaron Antón Caamaño, representante de Podemos nel Conseyu Asesor de la Llingua de Xixón, y Pablo Martínez Testa, responsable de política llingüística de Podemos Asturies. Nel alcuentru, celebráu de forma telemática, los representantes de la organización de reivindicación llingüística ficieron delles propuestes pa dar una presencia normal a la llingua asturiana nes redes y la páxina web de la formación. Tamién treslladaron la importancia de consiguir el máximu consensu posible de los partíos de la Xunta Xeneral pa llograr la oficialidá dientro de la reforma estatutaria. “Ye importante sumar el mayor númberu de votos afirmativos y el menor númberu de votos en contra”, apuntó Llera.
Los representantes de la organización aprovecharon la presencia de Laura Tuero, vocera y conceyala de Podemos en Xixón, pa comentar delles cuestiones relatives a la presencia de la llingua asturiana nel Conceyu. Llera punxo varios exemplos como la información del Teatru Xovellanos, cartelería o la inesistencia de la versión n’asturianu de la páxina web del Conceyu. “Tamos detectando ciertos retrocesos n’ámbitos onde l’usu del idioma taba afitáu y que vamos llevar al prósimu Conseyu Asesor de la Llingua de Xixón”.
El presidente de la organización quixo tamién reconocer y agradecer el trabayu del partíu pa llograr la convocatoria d’un nuevu conseyu dempués d’una temporada llarga ensin aconceyar.
