“Tou esti enfotu tien que ser un exemplu pa tola sociedá del esfuerciu y trabayu en comuña que tenemos que facer pa salvar l’idioma”
“Gracies a esti gran trabayu, la llingua asturiana tá presente na rede de tol mundo y convierte al asturianu nun idioma que xenera conteníos n’Internet y con futuru”
“Esti trabayu merez el reconocimientu del movimientu de reivindicación llingüística pol esfuerzu desinteresáu y l’enfotu ‘gratis et amore’ de una montonera de persones anónimes”
XIXÓN, 22/12/2020. L’asturianu alcuéntrase allugáu nel cuartu puestu mundial en volume de descripción d’elementos na Wikidata, la mayor base de datos llibre del mundo, un trabayu que va en paralelu al que se tá faciendo na Wikipedia. Dende Iniciativa pol Asturianu queremos treslladar a tolos y toles voluntaries la norabona y l’arguyu colectivu por esti gran trabayu.
“Gracies a esti gran trabayu, la llingua asturiana tá presente na rede de tol mundu y convierte al asturianu nun idioma que xenera conteníos n’Internet y con futuru, que s’alcuentra al nivel del resto de llingües del planeta” destacaren dende Iniciativa pol Asturianu
Toles persones que trabayen de manera continua y anónima son un exemplu pa tola sociedá asturiana y pa tolos y toles falantes. Tou esti enfotu tien que ser un exemplu pa tola sociedá del esfuerciu y trabayu en comuña que tenemos que facer pa salvar l’idioma. Tamos nun añu de bones noticies pal idioma y esta ye una más d’elles. Hai que celebrar esta cifra porque ye consiguir afitar l’idioma nel mundu, llogrando da-y visibilidá y usu.
La organización quixo añadir que “tou esti trabayu merez el reconocimientu del movimientu de reivindicación llingüística pol esfuerzu desinteresáu y l’enfotu ‘gratis et amore’ de una montonera de persones anónimes. En definitiva, esta xera y actitú ante l’idioma ye un exemplu pa toos y toes: primero porque s’usa l’asturianu pa falar de cualesquier tema; segundu, porque se fae ensin complexos y tercero, porque ye una responsabilidá de toos salvar y visibilizar este idioma”.
