La organización quier felicitar a tolos miembros de la institución por llograr da-y prestixu al idioma

Dende Iniciativa pol Asturianu vamos proponer al Gobiernu d’Asturies la concesión a l’ALLA de la Medaya d’Asturies por estos 40 años

XIXÓN, 15/12/2020. Güei l’Academia de la Llingua Asturiana cumple 40 años de funcionamientu. Nesti día, Iniciativa pol Asturianu quier reconocer el trabayu de los sos fundadores, de tolos presidentes y tolos y toles académiques que cola so formación intelectual ya entrega consiguieron qu’esti idioma tamién tuviese un espaciu pal estudiu, pa la conservación, pa la reivindicación y pa facer llegar al mundu la categoría que merez esta llingua.

La organización quier felicitar a tolos miembros y trabayadores de la institución por llograr da-y prestixu al idioma. “Tenemos que cellebrar que 40 años dempués de la so creación ye una institución afitada, indiscutiblemente importante pal idioma, reconocía polos Gobiernos d’Asturies y d’España y que tá faciendo una llabor académica de la que los y les falantes tenemos que sentinos arguyosos. L’ésitu d’estos 40 años de trabayu tien que ser una allegría colectiva pa tolos y toles falantes d’asturianu y de gallego-asturianu” apuntaren dende Iniciativa pol Asturianu.

Nesi sen, dende Iniciativa Pol Asturianu vamos proponer al Gobiernu d’Asturies la concesión a l’ALLA de la Medaya d’Asturies por estos 40 años de la que tolos y toles asturianes, independientemente de la ideoloxía, tenemos que sentinos mui contentos.

Va unes selmanes recibiéramos la noticia de que por primera vegada na hestoria el Gobiernu d’España va financiar con una aportación nos PXE a l’Academia de la Llingua Asturiana. Esta foi una reivindicación d’Iniciativa pol Asturianu dende la so fundación porque creemos que l’ALLA ye la institución más importante pal idioma. Queremos qu’esa noticia, una de les meyores pal idioma d’esti 2020, valga pa siguir trabayando en diferentes proyectos y xeres pa continuar ganando normalidá pal idioma y también pa consiguir que l’Academia de la Llingua Asturiana tenga la misma aportación estatal qu’el restu de les instituciones que trabayen poles diferentes llingües del Estáu.

Dende Iniciativa pol Asturianu queremos agradecer públicamente l’esfuerciu nel estudiu, la entrega y el trabayu científicu pol nuesu idioma n’actividá diaria de l’Academia de la Llingua Asturiana.