Iniciativa pol Asturianu reclama a PP y Foro nun dar pasos atrás na normalización del idioma. Dambes formaciones roblaron alcuerdos de gobiernu con Vox en Xixón y Tinéu qu’atenten contra la Llei d’Usu del asturianu y escontra los avances algamaos nestos años caberos.
La organización de reivindicación llingüística considera que ye inxustificable que PP y Foro acepten pasos atrás na presencia del idioma a nivel municipal. Ye incomprensible que Foro, que lleva la oficialidá nel programa, y el PP, qu’aprobó la Llei d’Usu del asturianu, claudiquen énte postures de marxinación hacia la llingua asturiana y tolerasen incumplimientos de la llexislación vixente en materia llingüística.
La ONG considera qu’hai una inmensa mayoría de la sociedá qu’apuesta por caltener los pasos daos y avanzar nel billingüismu, nel usu tresversal del idioma, asina como nel usu de la toponimia oficial.
No que respecta a Xixón, la organización recuerda que’l Plenu del Conceyu impulsó en 2019 una declaración institucional en defensa de la Oficina de Normalización Llingüística que cuntó colos sofitos de PSOE, Foro, Xixón Sí Puede, Izquierda Xunida y Ciudadanos y que valió pa defender l’organismu de diferentes ataques que taba sufriendo. Nesti momentu, eses amenaces de pieslle y bloquéu de la Oficina de Normalización vuelven ser una realidá. Nin Foro nin PP han permitir cualesquier ataque a esi muérganu que ye una ferramienta necesaria y útil pa poner en marcha les midíes que señalen la Ordenanza y los planes de normalización.
Iniciativa pol Asturianu considera inaceptable cualesquier pasu atrás na presencia de la llingua asturiana en Xixón, Tinéu o en cualesquier conceyu d’Asturies.
