Esti sábadu 17 de xunu va celebráse nos diferentes ayuntamientos d’Asturies la constitución de les diferentes corporaciones de los conceyos. Iniciativa pol Asturianu anima a los representantes escoyíos nes elecciones del 28 de mayu a que xuren o prometan el cargu utilizando la llingua asturiana. La entidá afala tamién a los 78 alcaldes y alcaldeses a faer usu del idioma na so toma de posesión y nos respectivos discursos d’investidura.
Esti xestu simbólicu ye una bona forma d’entamar los mandatos de les corporaciones teniendo presente la llingua propia d’Asturies. En numberoses ocasiones conceyales y diputaos asturianos, ya inclusive una eurodiputada, xuraron o prometieron el so cargu n’asturianu.
La organización de reivindicación llingüística considera qu’esta ye una bona oportunidá pa demostrar el compromiso llingüísticu de los 922 ediles y tamién una manera de siguir normalizando l’idioma.
Esti xestu tien d’acompañase dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, recuperar y oficializar la toponimia tradicional, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques que-y dean presencia al asturianu en tolos ámbitos de la xestión de los conceyos.
Dende Iniciativa pol Asturianu ufrimos el nuesu asesoramientu llingüísticu y animamos a tolos conceyales y alcaldes interesaos en dar pasos a favor de la normalización a ponese en contautu con nós nel nuesu corréu info@iniciativapolasturianu.org.
Testos de xuramentu y promesa pa conceyales:
Xuramentu. «Xuro, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu».
Promesa. «Prometo, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu».
Testos de xuramentu o promesa p’alcaldes y alcaldeses:
«Xuro o prometo cumplir con fidelidá les obligaciones del cargu d’Alcalde/esa Presidente/a del Escelentísimu Conceyu de _______ con llealtá al Rei, y curiar y facer curiar la Constitución como Norma Fundamental del Estáu».
