Iniciativa pol Asturianu denuncia un nuevu casu de discriminación llingüística y tresllada’l so sofitu al vecín d’Illas al que se-y pidió que tramitara un escritu “en el idioma oficial”. L’afectáu, Xuan Nel Gonzali, vecín de La Peral, solicitó un permisu al Conceyu pa la sustitución de la puerta y les ventanes de la so vivienda. Nun entamu, el Conceyu otorgó’l permisu, col pertinente pagu de tases, y solicita la ficha técnica del aparexador. A esti documentu, el ciudadanu retruca’l 10 de mayu con unes alegaciones n’asturianu a la Oficina Técnica Comarcal -Illas, comparte arquitectu con otros conceyos de la rodiada-.
La rempuesta del responsable de la Oficina Técnica Comarcal que tresllada l’alcalde d’Illas ye que l’asturianu nun ye un idioma cooficial na autonomía y requier al ciudadanu la presentación de la documentación de les alegaciones en castellán pa proceder a da-y una rempuesta.
Énte esta situación, Iniciativa pol Asturianu quier treslladar al afectáu, Xuan Nel Gonzali, la norabona pol so compromisu llingüísticu y recuerda que la Llei d’Usu y Promoción del Asturianu recueye claramente nel artículu 4, relativu al usu alministrativu de la llingua asturiana, que “tolos ciudadanos tienen drechu a emplegar l’asturianu y a espresarse n’él, de pallabra y per escrito”. Polo tanto, la llexislación ampara al ciudadanu a la hora de presentar documentación n’asturianu al Conceyu d’Illas y, de nengún mou, tien qu’abandonar el so idioma pa presentar un documento.
La organización considera que ye incomprensible qu’ocurra un casu como esti nun conceyu gobernáu por Izquierda Xunida, partíu que lleva la oficialidá de la llingua asturiana nel so programa autonómicu.
Inicitiva pol Asturianu solicita una intervención clara del alcalde del conceyu y una disculpa pública de la Oficina Técnica Comarcal. La organización recuerda que naide pue ser discrimináu pol usu alministrativu de la llingua asturiana y qu’estes rempuestes atenten contra la Llei d’Usu y de la Constitución Española.
