La Conseyería de Cultura, Política Llingüística y Turismu presentó estos díes la resolución pa determinar los conteníos d’una nueva convocatoria de les pruebes de capacitación de guía turísticu. Dientro de les pruebes va valoráse’l conocimientu de diferentes llingües como l’inglés, francés o alemán.

Nesi sen, Iniciativa pol Asturianu propón reconocer la capacitación de llingua asturiana dientro de la convocatoria de los guíes turísticos. Esta decisión permitiría llograr la preparación de los y les guíes na llingua propia y, d’esta manera, llograr certificar el conocimientu del idioma y poder ufiertalo turísticamente.

Dende va tiempu hai iniciatives empresariales orientaes nel sector de la cultura y turismu qu’apuesten pola llingua asturiana pa dar a conocer espacios d’Asturies que son un verdaderu ésitu. Apostar pola llingua propia xenera un valor añadíu a esa ufierta turística y permite tamién la promoción y normalización social del idioma. Amás, gracies a la cenciella intelixibilidá del asturianu col castellán ye posible facer cualesquier visita guiada n’asturianu con visitantes de diferentes puntos d’España.

Iniciativa pol Asturianu considera que l’habilitación en llingua asturiana dientro d’esta convocatoria de guíes turísticos permitiría equiparar el idioma al restu de llingües como l’inglés o l’alemán. La certificación de la formación n’asturianu dientro de les pruebes de capacitación de guíes turísticos llogaría tamién impulsar el conocimientu y la formación en llingua asturiana, amás de da-y más valor y prestixu al idioma.