La xornada dedicada al idioma va celebráse’l sábadu 20 d’agostu y va cuntar con diferentes actividaes pa tolos públicos
La organización va volver a tener el so stand nel certame con más d’una decena d’empreses comprometíes col idioma
Iniciativa pol Asturianu va volver cuntar col so espaciu dedicáu al idioma dientro de la Feria Internacional de Muestres d’Asturies, que se va celebrar nel recintu ferial Luis Adaro de Xixón del sábadu 6 al domingu 21 d’agostu. N’él van tar presentes 13 empreses comprometíes col idioma de diferentes sectores (industrial, telecomunicaciones, editorial, diseñu y moda, agroalimentariu, seguridá, traducción, audiovisual ya ociu). Les firmes que van tar presentes esti añu son 9000 Soluciones, Acuto Xuegos, Aitrad, Asturcón Seguridá, Cartonaxes VIR, Cerveza Caleya, Cuatro Gotes, Ediciones Radagast, Ediciones Trabe, Nordés Móvil, Tiza y Peonza, Puru Remangu y Ringo Rango.
Cola presencia na Feria de Muestres, la organización pretende facer llegar a la ciudadanía que l’asturianu ye un elementu de creación empresarial, xenerando actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier amosar que la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses.
Esti añu, como novedá, Iniciativa pol Asturianu va entamar, en collaboración cola Cámara de Comerciu de Xixón, una xornada dedicada la llingua asturiana dientru de la Feria Muestres. El Día de la Llingua Asturiana nel recintu ferial va celebráse’l sábadu 20 d’agostu. Con motivu d’esta cita, la organización ta preparando un bayurosu programa d’actividaes dientro del recintu ferial que va incluyir una visita guiada al Muséu del Pueblu d’Asturies, una visita institucional pelos stands de la Feria de Muestres qu’usen l’asturianu, actividaes pa la reciella y un recital poéticu, ente otres actividaes.
Va ser la quinta edición qu’Iniciativa pol Asturianu va tar presente na Feria de Muestres. La organización, que nun recibe nengún tipu d’ayuda pública, quier qu’esti espaciu seya un llugar d’alcuentru y un escaparate a la sociedá de la importancia que tien l’asturianu na economía asturiana. El stand va topase nel pabellón 3-4 del Palaciu de Congresos nun horariu de 11:00 a 14:30 hores y de 16:30 a 21:00 hores.
