El Gobiernu del Principáu d’Asturies presentó esta selmana la so nueva imaxe corporativa dixital. Una identidá anovada qu’inclui versiones n’asturianu, castellán y eonaviegu. Iniciativa pol Asturianu valora que se recueyan les tres llingües, pero apuesta pol usu de la doble denominación dentro del mesmu llogotipu, pa que tean presentes el castellán y l’asturianu o l’eonaviegu. D’esta manera, fadríase una meyor promoción y normalización de los idiomes.
Esta nun ye una fórmula nueva. Asina lo faen los gobiernos d’Euskadi y Navarra, qu’empleguen la doble denominación n’euskera y castellán. N’otros territorios, como ye’l casu de Galicia, el gobiernu autonómicu utiliza únicamente la versión en gallegu ‘Xunta de Galicia’.
Iniciativa pol Asturianu considera que l’usu bilingüe -asturianu y castellán, y eonaviegu y castellán na so fastera- de manera conxunta llograría una mayor normalización del idioma, y propón trabayar nel camín de que los nomes de les instituciones lleven namás les llingües propies, yá que ye un usu simbólicu d’especial relevancia que nun requeriría traducir los nomes.
