La cesta tien un preciu de 15,00 € pa socios y de 17,00 € pa los non socios
La entidá trata de visibilizar a empreses qu’usen l’asturianu na so actividá comercial
XIXÓN, 18 D’AVIENTU DE 2019. Iniciativa pol Asturianu ufierta pa estes fiestes navidigues una cesta de productos etiquetaos n’asturianu. Al traviés d’esta campaña, la entidá trata de dar visibilidá a distintes empreses del sector agroalimentariu qu’usen l’asturianu y utilicenlu na so actividá comercial. La iniciativa trata de mostrar como l’asturianu puede convertise nuna manera de xenerar valor añadíu a los productos, amás consiguiendo, d’esta manera, diferenciase d’otros productos.
Nesi sentíu, la organización recuerda que dos d’estes empreses yá tuvieron presentes nel espaciu d’Iniciativa pol Asturianu na Feria de Muestres y tamién ye la prueba de que l’asturianu tá ganando espaciu nel ámbitu empresarial y comercial, y amás en empreses nueves y de diferentes sectores. La entidá, al traviés d’esta iniciativa, trata de visibilizar a empreses qu’usen l’asturianu con normalidá na so actividá comercial.
Iniciativa pol Asturianu ufierta la cesta “Regala n’asturianu” a un preciu de 15,00 € pa socios y de 17,00 € pa los non socios y puede adquirise na oficina de la organización nel Hotel d’Asociaciones de Xixón (Avenida de Manuel Llaneza, 68 de Xixón) y contactando cola entidá al traviés del corréu info@iniciativapolasturianu.org o poles redes sociales.
