La organización resalta un nuevu escaezu de la llingua asturiana frente al restu de llingües del Reinu per parte de la Casa Real y del Rei
XIXÓN, 24 D’AVIENTU DE 2019. Iniciativa pol Asturianu llamenta que l’asturianu nun tenga presencia nel discursu del xefe del Estáu, el Rei Felipe VI. Por ello la organización, va facer llegar un añu más a la Casa del Rei la so quexa porque’l Xefe d’Estáu nun usare l’asturianu xunto al restu de les llingües del Estáu nel discursu de Navidá. Un fechu qu’Iniciativa pol Asturianu ve como una desilusión y “un nuevu escaezu de la llingua asturiana frente al restu de llingües del Reinu per parte de la Casa Real y el Rei”, como yá denunció la organización en delles ocasiones. La organización recuerda qu’en varies ocasiones el Rei Felipe VI yá utilizó varios topónimos tradicionales en diferentes actos d’entrega al Premiu Exemplar d’Asturies y polo tanto creemos que ye consciente de la presencia ya importancia cultural de la llingua asturiana.
Dende Iniciativa pol Asturianu recuerden que “el fechu anómalu de que la llingua asturiana nun seya entá oficial nun quita pa que la Casa Real use l’asturianu, yá que la normativa actual obliga a les instituciones a protexer y fomentar el so usu”, acordies colo qu’establez l’Estatutu d’Autonomía y la Llei d’Usu del Asturianu, amás de la Constitución y la Carta Europea de les Llingües Minoritaries, roblada por España.
Por ello Iniciativa pol Asturianu solicita al Xefe d’Estáu que, “como yá fai la Fundación Princesa d’Asturies en dalgunes de les sos comunicaciones dende va años, faiga usu del asturianu, una llingua española protexida pola Constitución, nel so discursu de Navidá y n’otros momentos d’especial simbolismu, asina como mui especialmente nes sos visites y nes de la Princesa de Asturies”.
