“El proyectu presenta, un añu más, una partida de 70.000 € pa la emisión de programes n’asturianu en RTPA cuando esi importe debería salir del propiu ente”

 “Insistimos na falta de tresversalidá de la política llingüística que nun puede depender únicamente de la Conseyería de Cultura y Turismu, sinón de tola acción de gobiernu

 XIXÓN, 16 D’AVIENTU DE 2019. Iván Llera, presidente d’Iniciativa pol Asturianu, fizo un análisis del proyectu de presupuestos pal añu 2020 presentáu pol Gobiernu d’Asturies. El representante de la entidá dixo que “reconociendo l’aumentu de la partida dedicada al asturianu, pasando de 1.703.630 € a 1.904.630 €, el Presupuestu presentáu pol Gobiernu nun recueye les espectatives d’Iniciativa pol Asturianu”.

Llera apuntó que “hai que reconocer l’aumentu de partíes como ye’l casu de la tresferencia a l’Academia de la Llingua Asturiana que medra nunos 12.500 €, pero consideramos que ye un error volver a destinar una partida pa la creación de conteníos n’asturianu en RTPA cuando esi importe debería salir de los propios presupuestos del ente. Al igual que los informativos de Deportes de la TPA nun salen de los presupuestos de la Dirección Xeneral de Deportes, creemos que la financiación de los programes n’asturianu de la RTPA nun deberíen de salir del Presupuestu de la Dirección Xeneral Política Llingüística”.

El presidente d’Iniciativa pol Asturianu apuntó tamién que “insistimos na falta de tresversalidá de la política llingüística. Nun puede depender únicamente de la Conseyería de Cultura y Turismu, sinón de tola acción de gobiernu. La normalización del asturianu depende de Política Llingüística y de Cultura, pero tamién afecta a Sanidá, Infraestructures, Educación, Facienda o Industria como recoyemos nel informe que presentamos va unes selmanes a los Grupos Parllamentarios”.

Iván Llera acabó diciendo que “reconociendo esi incrementu d’un 11,80 % del presupuestu de la Dirección Xeneral de Política Llingüística y la bona voluntá del Gobiernu, dende Iniciativa pol Asturianu consideramos qu’estos presupuestos son poco ambiciosos na cuestión llingüística”.

Siente equí les declaraciones d’Iván Llera, presidente d’Iniciativa pol Asturianu.