“Nun entendemos cómo ye posible que se presente una nueva páxina web que nun s’adapta a esi futuru plan que va a aprobase nun plenu” 

“Esta páxina web había de dar exemplu nun afitamientu ‘mínimu’ de la presencia y usu del asturianu”

XIXÓN, 10/06/2020. Iniciativa pol Asturianu denuncia la probetaya presencia de la llingua asturiana na nueva páxina web municipal. El vocal Fonsu Martín aprovecho pa dicir que “ye un claru retrocesu nel avance de polítiques llingüístiques a sabiendes de qu’una páxina web municipal tien abonda visibilidá. Ye una ventana’l mundu na que puede tar presente l’asturianu”.

Martín apuntó que “llama l’atención por parte de l’alministración municipal esti pasu atrás cuando dende’l Gobiernu del Principáu, tanto’l presidente delles veces, como nel usu audiovisual nes campañes de la Covid 19 ta apostándose por un usu del idioma d’un mou positivu”.

El vocal d’Iniciativa pol Asturianu comentó que “al traviés d’Internet podemos entrar a les páxines web municipales d’otres ciudaes como Santiago de Compostela, Vigo o La Coruña onde hai presencia digna del idioma propiu. ¿Por qué Xixón tien que ser menos nesi sentíu?”.

Fonsu Martín aprovecho pa manifestar que “dende Iniciativa pol Asturianu y dende otres entidaes como organizaciones polítiques, xuveniles, culturales y sindicales tuvimos trabayando durante meses nun nuevu Plan de Normalización. Nun entendemos cómo ye posible que se presente una nueva páxina web que nun s’adapta a esi futuru plan que va a aprobase nun plenu”.

El vocal acabó diciendo que “esta páxina web había de dar exemplu nun afitamientu ‘mínimu’ de la presencia y usu del idioma. P’atopar la presencia del asturianu hai qu’investigar y tolos enllaces dan error. El dominiu “xixon.es” nin siquiera ta redireccionáu y tovía lleva a la web vieya. L’asturianu nun sal bien paráu con esti cambéu”.