La entidá solicita al Gobiernu d’Asturies que-y otorguen de forma póstuma una Medaya d’Asturies

XIXÓN, 13/06/2020. Dexónos Celestina Ca Sanchu, n’Ambás (Grau), a los 98 años. Demientres la so vida ufrió a los asturianos y asturianes la tresmisión d’un patrimoniu cultural que s’espresaba n’asturianu y que gracies al llabor del so nietu Xosé «Ambás» y Ramsés Ilesies, pudo dase a conocer y conservase pal futuru.

Celestina llegó a ser la «bulita» d’Asturies nel ámbitu de la tradición oral y llegó a grabar dos discos, unu dientro de la colección Fontes sonores de la música tradicional asturiana, del Muséu del Pueblu d’Asturies, en 2007, y otru xunto al so nietu Ambás, con 94 años, tituláu «Bulita». La so impresionante capacidá pa recordar cantares y hestories permitió al so nietu Ambás recopilar un importante patrimoniu que dempués siguió trabayando per tol territoriu asturianu y s’espeyó en proyectos como’l grupu Tuenda y los programes Camín de cantares y Camín.

Dende Iniciativa pol Asturianu pidimos que se reconoza’l so llabor de forma póstuma con una Medaya d’Asturies, yá que Celestina llegó a convertise nun símbolu de la so xeneración como tresmisora de la cultura y la llingua asturiana.