“La organización pretende facer llegar a los centros educativos, profesoráu d’asturianu, sindicatos, asociaciones de pas y mas y families en xeneral la importancia de caltener y medrar el númberu d’estudiantes d’asturianu”
La entidá recuerda amás que ye un drechu irrenunciable de los neños y de les neñes estudiar asturianu en cualesquier centru educativu (concertáu o públicu) y tamién en cualesquier etapa educativa
XIXÓN, 05/06/2020. Iniciativa pol Asturianu invita a la Conseyería d’Educación a facer un esfuerciu pa que nengún alumnu vuelva a quedar ensin clas d’asturianu por falta de profesoráu, como vien asociendo n’otros cursos. Pa ello ye importante evitar la convocatoria de medies xornaes y los retrasos na aprobación de les hores de profesoráu asignaes a los centros concertaos.
Iniciativa pol Asturianu ta acabante presentar una nueva campaña informativa pa promocionar l’asignatura de Llingua Asturiana y Lliteratura y la de Gallego-asturianu nel Eo-Navia, en toles estayes educatives. Inaciu Galán, vocal de Rellaciones Institucionales de la organización, dixo que “con esta campaña queremos animar a les families a qu’escolaricen a los y les estudiantes na asignatura d’asturianu nel cursu qu’entra pa consiguir que l’idioma siga tresmitiéndose nes nueves xeneraciones de forma más efectiva”.
Galán aprovechó pa recordar que la matriculación nesta asignatura “ye un drechu irrenunciable de los neños y de les neñes escoyer estudiar asturianu en cualesquier centru educativu (públicu o concertáu) d’Asturies y tamién en cualesquier etapa educativa dende infantil a Bachilleratu”.
“La organización pretende facer llegar a los centros educativos, profesoráu d’asturianu, sindicatos, asociaciones de pas y mas y families en xeneral la importancia de caltener y medrar el númberu d’estudiantes d’asturianu. Ye un trabayu conxuntu de la sociedá el consiguir fomentar la formación y les competencies llingüístiques n’asturianu, más cuando nun momentu como l’actual los y les estudiantes pueden dir formándose p’algamar nel futuru el títulu B2 y la so certificación como una llingua más. Esta formación qu’entamen na educación obligatoria va vali-yos muncho nel futuru, pues ye un elementu que favorez la conocencia del so entornu, asina como les capacidaes pa deprender otres llingües” apuntó’l vocal de la organización.
El vocal comentó que “Iniciativa pol Asturianu convida a la Conseyería d’Educación y a la Dirección Xeneral de Política Llingüística a facer un esfuerciu pa que nengún alumnu o alumna vuelva quedar ensin clas d’asturianu o gallego-asturianu por falta de profesoráu. Dende la nuesa organización llevamos bien de tiempu denunciando decenes de casos nos que l’alumnáu queda ensin profesoráu y ensin l’asignatura que llibremente escoyeron”.
La campaña que va difundir en redes Iniciativa pol Asturianu ta formada por alredor de 20 cartelos n’asturianu y gallego-asturianu col lema “La oportunidá de conocer mundu, el to mundu. Escueyi llingua asturiana al matriculate nel institutu/colexu”. Con ella queremos animar yá a la matriculación, cuando nos centros ta faciéndose la prematrícula, que va condicionar de forma definitiva la posterior matrícula”. “Nun se pue esperar más a difundir l’asignatura, la campaña de difusión habría tar yá en marcha y con un especial esfuerciu nestes circunstancies nes que nun pue facese campaña física nos centros educativos”, esplica Galán.
Dende Iniciativa pol Asturianu queremos recordar que si dalgún alumnu/a o familia tien dificultaes pa matricular na asignatura pueden ponese en contacto con Iniciativa pol Asturianu pal asesoramientu y ayuda nel procesu de reclamación.
