La organización valora la presencia del idioma nel pabellón del Gobiernu d’Asturies y nos stands de los conceyos de Mieres, Llangréu y Xixón
La entidá cellebra tamién l’usu del idioma en campañes publicitaries y n’otres empreses presentes nel certamen
XIXÓN, 10/08/2021. Como tolos años, Iniciativa pol Asturianu ta presente col so espaciu d’empreses pol asturianu na Feria de Muestres de Xixón. Esta presencia permite amás facer una valoración directa de la presencia de la llingua asturiana nos diferentes espacios d’esti alcuentru empresarial ya institucional.
Nesi sen, la entidá valora la presencia del idioma nel pabellón del Gobiernu d’Asturies que lleva’l títulu “Asturies, Camín al andar” y fae un repás al Xacobéu utilizando la llingua asturiana.
La entidá quier tamién reconocer l’usu del idioma nos stands de los conceyos de Mieres, Llangréu y Xixón. Ye importante ver como s’afita esi usu del asturianu nestos espacios.
Por contra, Iniciativa pol Asturianu llamenta la desapaición de la llingua asturiana nel stand de la Universidá d’Uviéu. Dempués de varios años de presencia del idioma nel espaciu de la Universidá d’Uviéu resulta incomprensible ver pasos atrás na normalización social del asturianu. L’espaciu de la Universidá d’Uviéu llevaba varios años cuntando cola denominación de la institución n’asturianu y yera un tema normalizáu y afitáu.
Dende Iniciativa pol Asturianu facemos una invitación a los y les responsables de la institución académica y ufiertámonos pa facer un asesoramientu sobre la presencia del asturianu en campañes, publicaciones y trabayos como’l de la FIDMA pa qu’estes situaciones nun vuelvan a ocurrir y que l’asturianu tea al mesmu nivel que’l castellán.
