“A lo llargo de 10 años d’hestoria d’Iniciativa pol Asturianu condergamos siempres cualesquier ataque y agora pidimos lo mesmo”
“L’asturianu y la toponimia tradicional nun pueden utilizase pa xenerar conflictos falsos y dividir a la sociedá asturiana”
“Facemos un llamáu al Gobiernu d’Asturies y a la Conseyería de Cultura pa qu’esti tipu de situaciones nun vuelvan a ocurrir”
SOTU’L BARCU, 07/08/2021. El vocal de rellaciones institucionales d’Iniciativa pol Asturianu, Inaciu Galán, encabezó la comitiva de la organización que visitó esta mañana Sotu’l Barcu pa treslladar l’ánimu y el sofitu de la entidá al equipu de Gobiernu del Conceyu, dempués de les amenaces recibíes pa camudar la toponimia tradicional y oficial dende 2017.
Nel alcuentru, los miembros d’Iniciativa pol Asturianu esplicaron como “dempués de 10 años de la fundación de la nuesa organización tamos equí pa facer el mesmu llamáu que ficiéramos va una década. L’asturianu precisa de consensu, de suma de voluntaes y de trabayu en positivo”.
Galán, cofundador y ex presidente, aprovechó l’alcuentru pa destacar que “güei tamos en Sotu’l Barcu pa dar el sofitu de la nuesa organización al Gobiernu del Conceyu dempués de les amenaces recibíes pa camudar la toponimia oficial qu’aprobó’l mesmu plenu del Conceyu de Sotu’l Barcu”. Galán recordó que la forma deturpada que se quier recuperar nun ye tradicional y data de 1989.
Galán aprovechó tamién pa comentar que “l’asturianu y la toponimia tradicional nun se pueden utilizar pa xenerar conflictos falsos y dividir a la sociedá asturiana, y tampoco pueden normalizase de forma aisllada, ye importante acompañar la recuperación de la toponimia de campañes de sensibilización y un usu rigorosu per parte de les alministraciones, siendo exemplares nel cumplimientu de la toponimia oficial”.
Llamáu a la Conseyería
“Facemos un llamáu al Gobiernu d’Asturies y a la Conseyería de Cultura, Política Llingüística y Turismu, pa qu’esti tipu de situaciones nun vuelvan a ocurrir” apuntó Inaciu Galán.
El fundador de la organización acabó señalando que “10 años dempués de la fundación d’Iniciativa pol Asturianu ye un momentu afayadizu pa tener en cuenta’l motivu pol que nació esta organización: trabayar pola busca de consensos y alcuerdos sobre l’usu del asturianu. Güei venimos a reclamar lo que va 10 años pidíemos y que güei sigue vixente”.
