Iniciativa pol Asturianu entamó la selmana pasada una ronda de conceyos con representantes municipales de dellos conceyos d’Asturies. D’esta miente, la organización pretende analizar la situación política después de les elecciones del 28 de mayu y treslladar propuestes en materia de normalización llingüística pa desendolcar a lo llargo d’esti mandatu.
Estos alcuentros entamaron en Xixón con representantes de les tres fuercies de la oposición municipal. El presidente d’Iniciativa pol Asturianu, Iván Llera, y la vocal de Mocedá y Voluntariaú, Alma Hidalgo, aconceyaron con Javier Suárez Llana, conceyal d’Izquierda Xunida – Más País – Izquierda Asturiana; Olaya Suárez, de Podemos Xixón; y José Ramón Tuero, del PSOE. Mientres estos alcuentros la organización treslladó a los y les ediles la preocupación pola entrada nel gobiernu municipal de quien defende postures de marxinación hacia la llingua asturiana.
Llera y Hidalgo encamentaron a los conceyales a tar xixilantes énte posibles recortes al idioma y recordaron la necesidá de trabayar pa llograr un nuevu Plan de Normalización Llingüística. La organización aprovechó pa reclamar una mayor y meyor presencia del asturianu na páxina web del conceyu y un reglamentu d’usu de la llingua asturiana que recueya de manera oficial el criteriu d’usu pal idioma per parte de l’alministración local.
Conceyu n’Avilés
D’igual manera, Iniciativa pol Asturianu tamién aconceyó col conceyal de Deporte y Llingua Asturiana d’Avilés, David García. L’asociación propunxo-y la posibilidá de crear un muérganu consultivu relativu a la política llingüística nel Conceyu, asina como l’aprobación d’un Plan de Normalización que fixe los oxetivos y midíes nesta materia a lo llargo d’esta llexislatura. Tamién se plantegó la necesidá d’incorporar el derechu de la ciudadanía a dirixise n’asturianu al Conceyu bien mediante la modificación del reglamentu o al traviés d’una ordenanza específica.
Iniciativa pol Asturianu va continuar con esta ronda de conceyos con representantes municipales de toa Asturies. La organización yá solicitó formalmente un alcuentru cola nueva conceyala de Política Llingüística de Llangréu y tien previsto facelo nes próximes selmanes colos responsables nesta materia de Mieres y Carreño.
