La llingua asturiana va tar presente esta selmana na cuarta edición de los alcuentros de xóvenes falantes de llingües minorizaes (HIGA) que se celebren hasta’l 21 de xunetu en Vitoria-Gasteiz. La vocal de Mocedá y Voluntariáu d’Iniciativa pol Asturianu, Alma HIdalgo, va participar hasta’l vienres nesta convención que tien como principales oxetivos la revitalización de les llingües minorizaes y el trabayu en rede ente las diferentes comunidaes internacionales de falantes. D’esta manera, les persones pertenecientes a diferentes comunidaes de falantes van poder formase tanto en procesos de revitalización como nel campu del activismu llingüísticu, asina como compartir la so realidá y conocer la de los demás participantes.
Nel simposiu, Hidalgo va esponer la situación actual del idioma y el bon momentu actual pa la so recuperación y normalización. D’igual manera, va recordar lo positivo que resulta pal idioma cuntar con una presencia importante nes redes sociales y cómo la llingua asturiana ta revitalizándose nes nueves xeneraciones.
Nel alcuentru, nel que van participar activistes llingüísticos de tol mundu, Hidalgo va insistir na importancia de la declaración d’oficialidá nel Estatutu d’Autonomía y va señalar que l’asturianu ye una de les llingües que participen nel congresu qu’entá nun tien un estatus d’igualdá nel sistema xurídicu, dalgo que xenera torgues pa los sos falantes y complica la tresmisión xeneracional. Mientres la so estancia en Vitoria-Gasteiz, la representante asturiana tamién va repasar la complicada situación del idioma na escuela lo que tamién afeuta direutamente al so conocimientu.
La directiva de l’asociación va repasar tamién la trayectoria d’Iniciativa pol Asturianu dende la so fundación en 2011, atrayendo nuevos perfiles y sensibilidaes al trabayu colectivu pol idioma, llogrando sumar voluntaes y trabayar en positivo pola so normalización abriendo nuevos espacios pa la dignificación de la llingua asturiana.
Iniciativa pol Asturianu agradez al Conceyu de Vitoria-Gasteiz esta convidada pa dar a conocer la situación del asturianu y por tener en cuenta al nuesu idioma.
