La organización treslladó al representante de Foro la necesidá de facer un esfuerciu políticu dende l’entendimientu pa salvar l’idioma
Iniciativa pol Asturianu animó al diputáu a entamar un procesu de negociación falando con toles fuercies polítiques y convidando a sumase a toos al consensu constitucional pol asturianu
“Nesti momentu nel qu’hai una amplia mayoría aritmética a favor de la oficialidá tenemos qu’entamar a trabayar ensin partidismos, ensin protagonismos nin esclusiones y sumar voluntaes pol idioma”
Iniciativa pol Asturianu ufiértase pa trabayar nesa negociación col altor de mires y pa facer de ponte ente les diferentes fuercies polítiques a favor de la oficialidá
XIXÓN, 08/01/2021. Na mañana de güei, Inaciu Galán, vocal de Rellaciones institucionales d’Iniciativa pol Asturianu aconceyó con Adrián Pumares, diputáu de Foro na Xunta Xeneral. Nel alcuentru, el representante de la organización de reivindicación llingüística aprovechó pa treslladar a Pumares la necesidá de “facer un esfuerciu políticu dende l’entendimientu pa salvar l’idioma. Creemos que tamos nun momentu nel que la unidá y l’entendimientu son mui importantes”. Adrián Pumares confirmó la so predisposición a negociar una reforma del Estatutu y la oficialidá cola FSA-PSOE, recordando que ye esti partíu quien ha tomar la iniciativa de poner en marcha’l procesu.
Dende Iniciativa pol Asturianu comentóse col diputáu de la necesidá d’entamar el procesu de negociación a lo llargo d’esti añu, falando con toles fuercies polítiques y convidando a sumase a toos al consensu constitucional pol asturianu nesti añu 2021 qu’acaba d’entamar. Entendiendo y siendo conscientes de la situación creemos que ye posible falar, negociar y trabayar nuna reforma estatutaria pa llograr la oficialidá de la llingua asturiana y l’eonaviegu o fala.
“Nesti momentu nel qu’hai una amplia mayoría aritmética a favor de la oficialidá tenemos qu’entamar a trabayar ensin partidismos, ensin protagonismos nin esclusiones y sumar voluntaes pol idioma. Tenemos qu’aprovechar esta mayoría pa facer hestoria y llograr dar normalidá constitucional nel Estatutu a les llingües d’Asturies” apuntó Galán.
Los representantes d’Iniciativa pol Asturianu anunciaron tamién que “Iniciativa pol Asturianu s’ufierta pa trabayar nesa negociación col altor de mires y pa facer de ponte ente les diferentes fuercies polítiques a favor de la oficialidá”.
Adrián Pumares confirmó a Iniciativa pol Asturianu l’apertura del debate internu d’esta cuestión en Foro que yá llevaba la oficialidá del asturianu n’anteriores programes electorales como’l de 2015. Esti compromisu supón pa Iniciativa pol Asturianu qu’esiste por fin la confirmación de los votos pa qu’a lo llargo de 2021 pueda facese la reforma del Estatutu colos 27 votos necesarios p’aprobala. Esta ye una noticia hestórica p’Asturies, dempués de 40 años d’autonomía, que van facese nel mes d’avientu, un bon momentu pa llegar yá con una reforma aprobada.
