“Resulta incomprensible que’l presidente del Gobiernu d’Asturies y Secretariu Xeneral de la FSA posponga sine die una midía que recueye’l propiu programa electoral col que ganó les elecciones”
“¿Va parar el restu de l’acción llexislativa de la Xunta Xeneral? Si nun ye asina nun tien sentíu que’l parllamentu asturianu nun pueda trabayar na reforma del Estatutu”
XIXÓN, 03/01/2021. Dempués del anunciu del presidente Adrián Barbón sobre un posible aplazamientu d’una reforma estatutaria pa incluyir la oficialidá del asturianu, dende Iniciativa pol Asturianu queremos reclamar valentía política a la FSA pa cumplir el so propiu programa electoral nel que ta recoyida l’aprobación de la oficialidá de la llingua asturiana. Nesi sen dende la organización declararon que “resulta incomprensible que’l presidente del Gobiernu d’Asturies y Secretariu Xeneral de la FSA posponga sine die una midía que recueye’l propiu programa electoral col que ganó les elecciones”.
Dende la entidá apuntaron que “nun vale escudase na situación sanitaria, de la que somos conscientes, pero ¿va parar el restu de l’acción llexislativa de la Xunta Xeneral? Si nun ye asina, nun tien sentíu que’l parllamentu asturianu nun pueda trabayar na reforma del Estatutu. Y más cuando l’andanciu dexó claro que’l Gobiernu d’Asturies requier más competencies, como vien diciendo’l propiu presidente Barbón”.
Iniciativa pol Asturianu tamién criticó la postura del presidente d’Asturies al rodiu del desconocimientu de la postura d’otros grupos parllamentarios, dalgo que resulta llamativo pa la organización. “Asturies tien presupuestos gracies a un procesu de negociación ente’l Gobiernu y los diferentes grupos parllamentarios. Nun se dexó de presentar un borrador de presupuestos por ‘nun saber si dan los númberos’. Tamos nun momentu nel que fai falta valentía y voluntá pa iguar una situación de desigualdá de drechos dende va 40 años. El Gobiernu d’Asturies tien qu’abrir un procesu de diálogo colos diferentes partíos pa llograr un gran consensu col idioma”.
Pa terminar, dende Iniciativa pol Asturianu convidaron a tolos grupos parllamentarios que nun tienen una postura clara, dean un pasu y definitivamente acaben de mostrala.
