XIXÓN, 12/01/2021. Iniciativa pol Asturianu presentó güei la campaña ‘Meyor noticia pal asturianu en 2020’ cola que la organización pretende escoyer, pente medies de la tradicional votación popular, la meyor noticia pa la llingua asturiana nel pasáu añu 2020. Dende la organización apuntaron que “esta iniciativa estrenóse nel añu 2013 y cada añu que pasa va medrando’l númberu de participantes y la cantidá de noticies positives pal idioma. Tamién val pa facer un repás a tol llabor d’Iniciativa pol Asturianu y pa comprobar como añu a añu la llingua asturiana tien una repercusión positiva nos medios. Esti añu vimos como l’asturianu tien una partida presupuestaria nos PXE, usu asturianu normal nes campañes del andanciu, avances na toponimia, nuevos planes de normalización…”.
Pa Iniciativa pol Asturianu esta votación ye importante porque “con esta campaña pretendemos facer llegar a los asturianos y a les asturianes delles bones noticies pal nuesu idioma. Amás, dende Iniciativa pol Asturianu queremos recoyer lo positivo d’esti 2020 pal asturianu y treslladar que la llingua asturiana va ganando presencia nes instituciones y normalidá na sociedá”.
Los y les participantes pueden escoyer ente un total de 25 bones noticies pal asturianu de diferente tipu, pudiendo seleccionar hasta 10 al mesmu tiempu. La votación entama esti llunes 11 de xineru y va acabar el miércoles 20 d’esti mes. Como novedá esti añu vamos facer un sortéu de llibros ente tolos y tales participantes.
N’otros años foron elexíes l’usu del asturianu per parte del presidente Barbón, la conferencia del rector García Granda na Universidá d’Uviéu nel 2018 o la declaración de la oficialidá nel conceyu de Bimenes del 2016.
