En segundu llugar queda “Barbón conviértese nel primer presidente qu’usa l’asturianu de forma consciente nuna rueda de prensa” y nel tercer puestu “Usu del asturianu con normalidá nes campañes del andanciu y de salú del Gobiernu d’Asturies”
“Esti añu tuvo munchu pesu la presencia de la llingua asturiana nel mundu empresarial pola apaición de Nordés (quinta meyor noticia), el nuevu xuegu d’Acuto “¿Cuála ye?”, sesta noticia y l’usu del asturianu nes campañes de Danone (octava noticia)”
XIXÓN, 22/01/2021. Iniciativa pol Asturianu fixo públicu’l resultáu de la votación popular pa buscar la meyor noticia pal asturianu en 2020. Esta ye la séptima edición que s’entama esti procesu pa elixir la meyor noticia del añu mediante una consulta popular y que nesta ocasión siguió medrando en participación.
D’esta manera, los y les internautes escoyeron la noticia de que “Inclúise per primer vegada una partida pa l’Academia de la Llingua Asturiana nos Presupuestos Xenerales del Estáu”.
Con una diferencia d’unos pocos votos quedó posicionada, en segundu llugar, la noticia de que “Barbón conviértese nel primer presidente qu’usa l’asturianu de forma consciente nuna rueda de prensa”. El presidente del Gobiernu d’Asturies fizo usu del asturianu nuna de les ruedes de prensa sobre la situación sanitaria del andanciu del coronavirus.
En tercer llugar, los y les internautes elixeron la noticia de “Usu del asturianu con normalidá nes campañes del andanciu y de salú del Gobiernu d’Asturies”.
La organización quixo destacar que “esti añu tuvo munchu pesu la presencia de la llingua asturiana nel mundu empresarial pola apaición de Nordés (quinta meyor noticia), el nuevu xuegu d’Acuto “¿Cuála ye?”, sesta noticia y l’usu del asturianu nes campañes de Danone (octava noticia)”.
Dende Iniciativa pol Asturianu queremos agradecer la colaboración y participación a toles persones que participaron na escoyeta.
