“Esta proposición ye un homenaxe a la propia escritora, pero tamién a les Lletres Asturianes y a les muyeres escritores n’asturianu”

“Enriqueta González Rubín ye un símbolu nun solo de Santianes sinón una referencia de too Ribeseya y de la Lliteratura Asturiana”

XIXÓN, 26/01/2021. Iniciativa pol Asturianu sofita la propuesta presentada nel Conceyu de Ribeseya pa dar el nome d’Enriqueta González Rubín a la Casa de Cultura de la villa. La organización súmase a la propuesta plantegada’l 17 de xineru pol grupu municipal Pueblu como un homenaxe a la escritora de Santianes. «La Casa de Cultura nun tien un nome propiu nesti momentu, polo que sobrepone-y el nome d’Enriqueta González Rubín ye un xestu d’alcordanza cola escritora, la primer novelista en llingua asturiana”.

“Al igual que n’otros conceyos d’Asturies como Xixón, cola Biblioteca Xovellanos, o Cabranes, cola Biblioteca Mª Xosefa de Canellada, el Conceyu de Ribeseya tien la oportunidá de da-y más prestixu a la figura d’Enriqueta González Rubín. Esta proposición ye un homenaxe a la propia escritora ribeseyana, pero tamién a les Lletres Asturianes y a les muyeres escritores n’asturianu” apuntaron dende la organización.

Dende Iniciativa pol Asturianu declararon tamién que “Enriqueta González Rubín ye un símbolu nun solo de Santianes sinón una referencia de too Ribeseya y de la Lliteratura Asturiana, asina como un recursu turísticu que tien d’aprovechase».

Más información de la escritora Enriqueta González Rubín al traviés d’esti enllaz de la Wikipedia n’asturianu