Iniciativa pol Asturianu critica’l pieslle del Serviciu de Normalización Llingüística de Castrillón y afala al alcalde a reabrilu. Esta decisión llega depués de tener al responsable del serviciu ensin ocupación dala nel so puestu de trabayu dende la llegada a la Casa Conceyu del equipu de gobiernu municipal nuevu. La organización destaca que los servicios de normalización llingüística son muérganos fundamentales pal desendolcu de la política llingüística a nivel municipal que, amás, cunten con financiación autonómica.
El borrador de presupuestos del Gobiernu asturianu pal próximu añu conseña una partida de 19.400 euros pa esti serviciu que’l Conceyu de Castrillón va dexar de recibir de caltenese esta decisión. Iniciativa pol Asturianu recuerda al PP que los conceyos son competentes p’asegurar la efectividá del exerciciu de los drechos llingüísticos de la ciudadanía acordies cola Llei d’Usu y Promoción del Bable/Asturianu y pide al partíu una reflexón sobre les polítiques de normalización llingüística que practica nos conceyos.
Pa la entidá de reivindicación llingüística el PP caltién un doble discursu cola llingua asturiana y al mesmu tiempu que bendiz la Llei d’Usu y la so aplicación, cuando tien oportunidá de facelo, actúa de manera contraria al espíritu d’esta norma. Poro, Iniciativa pol Asturianu afala al alcalde de Castrillón a recuperar el Serviciu de Normalización Llingüística del conceyu como un serviciu que xenera actividá nel mesmu, ayuda a desendolcar la normalización llingüística y anima al usu en diferentes campañes amás de dinamizar la cultura del conceyu.
