Iniciativa pol Asturianu ta acabante de contactar con BlueSky pa proponer la presencia de la llingua asturiana nel portal de la plataforma. Bluesky ye una rede social de microblogging o de mensaxes curtios. Anguaño, yá s’alcuentra disponible en munchos idiomes de diferentes territorios, ente ellos l’aragonés, pero nun inclúi l’asturianu entá. De fecho, a la hora de faer una publicación, l’aplicación permite seleccionar qué idioma s’utiliza, p’ayudar a categorizar los diferentes testos espublizaos na páxina. Varios usuarios de la rede social ficieron llegar a la organización esta reivindicación pa llograr la visibilización del idioma.
Por ello, Iniciativa pol Asturianu ta acabantes de contactar cola plataforma pa proponer la creación d’una versión n’asturianu del portal y la creación de la categoría pa que los usuarios del nuevu portal qu’usen la llingua asturiana nes sos publicaciones puedan categoralizalos. Esta iniciativa permitiría llograr la visibilización del idioma nesta nueva rede social y permitiría siguir normalizando la nuesa llingua.
L’asociación tien ente los sos fines fundacionales “afalar a les instituciones, organismos privaos y sociedá civil a tomar les midíes necesaries pa la so normalización como ferramienta de comunicación, elementu identitariu y patrimoniu cultural y económicu de la sociedá asturiana que ye”. Con esta propuesta a la plataforma social BluSky, la organización de reivindicación llingüística pretende llograr dar presencia al nuesu idioma nun espaciu usáu mayoritariamente pola parte más moza de la sociedá.
