L’asturianu nun tuvo presente nel discursu del Xefe del Estáu, el Rei Felipe VI. Iniciativa pol Asturianu reclama la presencia del asturianu dientro d’esti mensaxe nel que namás apaecen les llingües oficiales d’España. Nesi sen, la organización apunta que ye conveniente recordar qu’anque la llingua asturiana entá nun seya oficial si ta reconocida nel Estatutu d’Autonomía del Principáu d’Asturies; la propia Constitución Española, nel so artículu 3, reconoz que ‘la riqueza de les distintes modalidaes llingüístiques d’España ye un patrimoniu cultural que será oxetu d’especial respetu y protección’.
El propiu Xefe del Estáu reconoció nel so discursu, al rodiu de la Constitución, que “aprobamos una visión compartida de España que reconoce el derecho de todos a sentirse y a ser respetados en su propia personalidad y en su cultura; con sus lenguas, tradiciones e instituciones”. Esta declaración nun se cuerrespuende col usu de les diferentes llingües d’España que, entá, nun gocen d’un estatus d’oficialidá como ye’l casu del asturianu o del aragonés.
Iniciativa pol Asturianu considera que’l discursu d’esti añu 2023, nel que se consiguió’l drechu d’usu de toles llingües d’España nel Congresu de los Diputaos, yera una ocasión perfecta p’animase a usar, ensin esclusiones, toles llingües del Estáu.
Iniciativa pol Asturianu solicita al Xefe del Estáu qu’amuese respetu por toles llingües d’España, independientemente del so estatus llegal, yá que los y les asturianes tenemos el mesmu drechu a que les nueses llingües apaezan xunto a les demás nes pallabres del cabezaleru del Estáu al que pertenecemos.
