La organización considera importante l’usu de los topónimos de Courias, Xixón y Cangues

Iniciativa tamién propón una mayor presencia de lliteratura asturiana nestos espacios pa ufiertar a los visitantes

XIXÓN, 24/06/2020. Iniciativa pol Asturianu, al traviés del so presidente, Iván Llera, fizo un llamáu a los Paradores Nacionales n’Asturies pa usar la toponimia de los distintos llugares aprovechando la reapertura de los establecimientos turísticos. Llera recordó que “ye importante normalizar l’usu de los topónimos tradiciones nestos espacios y qu’esto nun va suponer nengún tipu de problema col visitante”.

El presidente de la entidá apuntó que “aprovechando que van a volver a abrise estos espacios animamos a facer un esfuerciu pa da-yos visibilidá a los topónimos de Courias, Xixón y Cangues d’Onís na cartelería d’estos espacios, nes sos redes, anuncies y nes páxines web”.

P’acabar, Iván Llera, propunxo ufiertar a los visitantes obres lliteraries n’asturianu nos espacios de descansu de los diferentes Paradores d’Asturies pa que los visitantes puedan averáse a la lliteratura n’asturianu, a los nuesos y nueces escritores y conocer tamién la llingua asturiana.