La organización plantegó al partíu del Gobiernu una montontera de midíes concretes pa meyorar la normalización y presencia del asturianu
Iniciativa pol Asturianu animó a la FSA a tener presente l’asturianu con normalidá na so páxina web y comunicaciones
UVIÉU, 18/06/2020. Inicitiva pol Asturianu aconceyó güei cola FSA-PSOE pa treslladar al partíu varies demandes relatives a la llingua asturiana. Iván Llera, presidente d’Iniciativa pol Asturianu, ya Inaciu Galán, vocal de rellaciones institucionales aconceyaron telemáticamente con Gimena Llamedo, secretaria d’organización de la FSA y diputada na Xunta Xeneral, Mª Lluz Pontón, secretaria d’educación, universidaes y normalización llingüística de la FSA y María Fernández, senadora del PSOE. Los voceros d’Iniciativa pol Asturianu plantegaron en primer llugar la importancia de cuntar con un Plan de Normalización que faiga una programación del trabayu a realizar estos años na Dirección Xeneral de Política Llingüística.
Llera comentó delles midíes concretes dientro de la RTPA como cuntar con una actitú sensible y favoratible al idioma que permita algamar espacios nuevos nel ente, presencia del asturianu nos informativos, incidiendo especialmente na cuestión del usu oral preferencial de los topónimos tradicionales oficializaos. Nel conceyu, el presidente tamién comentó’l casu de RTVE y dixo que “sabemos que nun ye competencia del Gobiernu asturianu, pero taría bien que tuvieren contactos con ellos pa entamar a tener programación n’asturianu. Y podría entamase por un informativu en TVE y otru en RNE.”.
Galán pidió axilizar el procesu pa cuntar col reglamentu d’usu del asturianu na Xunta Xeneral y siguir trabayando cola utilización de la imaxe corporativa billingüe en toles Conseyeríes y na Presidencia del Gobiernu.
Llera y Galán apuntaron tamién varies midíes concretes pa educación como mantener y medrar les campañes de matriculación, plan pilotu, tar sollertes pa buscar una solución a la especialidá docente y la presencia del asturianu na etapa d’infantil.
Los representantes de la entidá amosaron tamién el descontentu d’Iniciativa pol Asturianu colos pasos atrás na toponimia y pidieron un esfuerzu pa sacar alantre la toponimia nos conceyos que tovía nun la tienen aprobada. Dende la organización pidieron un esfuerciu col usu de los nomes tradicionales de les playes, montes y puerto, pidiendo que s’oficializaren les formes tradicionales, y que se reclame l’usu a nivel estatal de la toponimia oficial, como por exemplu nes carreteres.
Amás, dende Iniciativa pol Asturianu animóse a la FSA a tener presente a l’asturianu con normalidá na so páxina web y comunicaciones, en coherencia col so programa y defensa de la oficialidá.
Llera y Galán treslladaron a les representantes de la FSA-PSOE que se dan les circunstancies pa entamar a trabayar na reforma estatutaria nesta llexislatura y buscando siempres el máximu consensu posible ente les fuercies polítiques. Nesta llexislatura podría dase l’aritmética parllamentaria n’Asturies y en Madrid pa l’aprobación d’un nuevu estatutu cola oficialidá incluyida.
Pa terminar dende la organización pidieron más pasos alantre na normalización y l’usu del asturianu en tolos niveles del gobiernu y conceyos y punxeron l’exemplu pa tola actividá gubernamental de la campaña informativa nel andanciu del coronavirus. “Fíxose un usu normal del asturianu y gracies a ello ganóse visibilidá y normalidá, agora namás queda treslladar esa forma de trabayar al restu de les acciones del gobiernu”.
Sienti equí les declaraciones d’Inaciu Galán, vocal de relaciones institucionales d’Iniciativa pol Asturianu
