Reclama a PP, Cs, VOX y Pedro Leal que dean esplicaciones pola so negativa a dotar de llibertá pal usu del asturianu tal y como establez la Llei d’Usu
UVIÉU, 01/07/2020. El parllamentu asturianu aprobó güei nuna votación la modificación del reglamentu del mesmu pa sumar a otros participantes nel llabor parllamentariu, como los miembros del Gobiernu que nun son diputaos, al drechu amparáu pola Llei d’Usu del asturianu de 1998 a usar l’asturianu en tolos ámbitos de forma oral y escrita.
Iniciativa pol Asturianu camienta positiva esta modificación del reglamentu sofitáu polos grupos de FSA-PSOE, Podemos Asturies, Izquierda Xunida d’Asturies y Foro (nesti casu namás col votu d’Adrián Pumares). Queremos felicitar a estos grupos por esti llogru d’importancia pa la presencia pública del idioma na máxima institución de representación de los asturianos y asturianes. Pa Iniciativa pol Asturianu «agora ye’l momentu de poner en funcionamientu esta modificaciíon del reglamentu usando l’asturianu en toles ocasiones posibles, pa lo qu’animamos a los diputaos y diputaes a facelo y a formase en casu de que nun tengan esta posibilidá, yá que la meyor política de normalización y dignificación del idioma ye l’usu públicu del mesmu».
Nun entendemos dende Iniciativa pol Asturianu como PP y Ciudadanos faen campaña en gallegu al otru llau de la ría del Eo y sofiten la oficialidá y la normalización del gallegu y como equí n’Asturies siguen aneciando en postures contraries contra midíes absolutamente de mínimos, como ye la llibertá d’usu del idioma nel parllamentu asturianu, qu’ellos mesmos -nel casu del PP- aprobaron cola Llei d’Usu del asturianu 1998. Per otru llau dende Iniciatica pol Asturianu queremos condergar les pallabres del diputáu de VOX que dixo nun querer entender asturianu, lo que demuestra una absoluta falta de respetu a los ciudadanos y ciudadanes que representa, asina como una demostración de la obstentación de la inorancia.
Iniciativa pol Asturianu va ufrir de nuevo, como yá fixo va unos años, a los grupos de la Xunta Xeneral, la posibilidá d’organizar un cursu d’asturianu na sede parllamentaria, col envís de que puedan ameyorar el so usu del asturianu y tener les ferramientes pa usar en contestos públicos l’idioma que yá ye pa la mayoría d’ellos parte del so entornu y la so realidá familiar y social diaria.
