XIXÓN, 25/06/2021. El BOPA de güei recueye la vuelta atrás nel decretu toponímicu del conceyu de Valdés, aprobando de nuevo la forma Luarca xunto a la tradicional, Ḷḷuarca, oficializada en 2014. Pa Iniciativa pol Asturianu permitir estos pasos atrás na normalización de la toponimia tradicional ye una decepción política y va contra l’espíritu de la Llei d’Usu, que se redactó col oxetivu de recuperar les formes tradicionales pa evitar la so desapaición. Relegar la forma tradicional, non solo a compartir espaciu cola forma yá derogada, sinón a facelo en segundu llugar, va xusto nel sen contrariu al establecíu pola llei, convirtiendo a la forma tradicional nun adornu.

La entidá denunció que “usar les ferramientes llegales creaes pa normalizar la toponimia tradicional pa facer el camín contrariu, ye una trampa y un malísimu precedente”.

“Ye obligación de la Conseyería de Cultura y Política Llingüística facer pedagoxía sobre la necesidá de recuperar les formes tradicionales y vixilar el cumplimientu efectivu. Esti usu nun se fixo nestos años en nengún casu col topónimu de la capital de Valdés” apuntóse dende la organización.

Iniciativa pol Asturianu quier denunciar que nun ye la primer vegada que se dan pasos atrás cola toponimia tradicional, pero sí la primera nesta llexislatura, la qu’ha ser la de la oficialidá. Ye por ello que resulta especialmente llamentable que se faiga esti camín inesplicable de vuelta atrás.