XIXÓN, 09/06/2021. La entidá de turismu de la Mancomunidá del Valle del Nalón estrenó hai unes selmanes la so páxina web oficial. A pesar de la bona noticia qu’esto supón dende’l puntu de vista turísticu, Iniciativa pol Asturianu llamenta la nula presencia del asturianu na páxina: nun apaez en nenguna de les distintes secciones que tien. Teniendo en cuenta la intención de la páxina web, que busca la promoción del turismu nestos conceyos, sería interesante faer usu de les distintes llingües (asturianu, castellán yá inglés) pa dar a conocer el Valle del Nalón a los y les visitantes.
Amás d’esto, hai que tener en cuenta que l’asturianu tamién ye una forma de xenerar imaxe de marca dende’l puntu de vista turísticu. Faer usu de la llingua asturiana nun ye nada nuevo nin complicao. Dellos conceyos yá faen usu del idioma pa dase a conocer turísticamente, como ye’l casu de Xixón. Otres asociaciones como la de los Vaqueiros de l’Alzada de Torrestío tienen una versión n’asturianu de les sos publicaciones turístiques faciendo normal l’usu del idioma ya incorporándolo al restu de llingües.
Iniciativa pol Asturianu llamenta, amás, la probetaya presencia de la toponimia oficial de los conceyos que formen parte de la Mancomunidá del Valle del Nalón nel recién estrenáu portal. Toos ellos oficializaron la toponimia tradicional hai más de diez años (Llangréu en 2005, Casu en 2007, Llaviana y Samartín del Rei Aurelio en 2008 y Sobrescobiu en 2009) en cumplimientu del artículu 15 de la Llei 1/98, de 23 de marzu, d’Usu y Promoción del Asturianu.
Por ello, Iniciativa pol Asturianu pide una versión n’asturianu d’esta páxina web y faer usu de la toponimia oficial de los distintos conceyos que formen parte de la Mancomunidá. D’esta manera, tamién se va a contribuyir a la normalización del asturianu, amás d’ameyorar el turismu arriqueciéndolu col so idioma.
