Iniciativa pol Asturianu va tar presente, una vegada más, na 66 edición de la Feria Internacional de Muestres d’Asturies (FIDMA) que se va celebrar en Xixón del 5 al 20 d’agostu. Como ye vezu, la organización va a presentar un espaciu con diferentes empreses de diversos sectores productivos qu’utilicen la llingua asturiana na so actividá comercial. En total van ser catorce firmes como Aitrad, Acuto Xuegos, Asturcón Seguridá, Cartonaxes VIR, Cuatro Gotes Producciones, Cerveza Caleya, Mondo Manzana, Nordés Telefonía, Pan Duru, Puru Remangu, Ediciones Radagast, Ringo Rango, Tiza y Peonza y Ediciones Trabe. Les compañíes formen parte de sectores tan diversos como l’agroalimentariu, editorial, audiovisual, moda, infantil, telefonía, industrial, seguridá y traducción.
Al traviés d’esta iniciativa, l’asociación pretende facer llegar a la ciudadanía que l’asturianu ye un elementu que favorez la creación d’empreses y qu’orixina actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier amosar que la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses.
Iniciativa pol Asturianu, que nun recibe nengún tipu d’ayuda pública, quier qu’esti espaciu seya un llugar d’alcuentru y un escaparate a la sociedá asturiana de la importancia que tien l’asturianu na economía asturiana. L’espaciu va topase nel pabellón 3-4 del Palaciu de Congresos nel stand 14.
II Día de la Llingua Asturiana
En 2022, per primera vegada na historia, la FIDMA dedicó un día a la llingua propia d’Asturies gracies a la collaboración ente Iniciativa pol Asturianu y la Cámara de Comercio. La segunda edición d’esta xornada va celebrase’l sábadu 19 d’agostu. El II Día de la Llingua Asturiana na feria va ufiertar un bayurosu programa d’actividaes que va involucrar a conceyos y empreses que tienen presencia nel recintu ferial Luis Adaro. Iniciativa pol Asturianu anima a la sociedá civil a participar nesta xornada de valoración y reivindicación del idioma.
