Depués de conocer el fallecimientu del músicu Xulio Ramos, Iniciativa pol Asturianu quier amosar públicamente’l pesar conxuntu del colectivu pol fallecimientu del cantautor.
La organización de reivindicación llingüística quier reconocer la so carrera musical na que la llingua asturiana siempres tuvo un papel fundamental, dende los sos entamos musicales formando parte de la xeneración del Nuevu Cantu Astur.Tamién tenía interés pol teatru, compartiendo de mozu esta afición col escritor Andrés Solar.
Ramos componía n’asturianu y en castellán y convirtióse nuna persona exemplar pol so compromiso llingüísticu. Foi un exemplu de defensa del idioma y de poner la so capacidá de creación musical al serviciu del mesmu. Nos últimos años compartió espaciu y collaboración con Iniciativa pol Asturianu nel Conseyu Asesor de Normalización Llingüística de Xixón.
