Por cuenta de la celebración del Día d'Asturies, Iniciativa Pol Asturianu, propón a tolos asturianos y asturianes, yá seyan asturfalantes o non, una campaña viral en redes sociales pol usu, fomentu, caltenimientu y dignificación de la llingua asturiana, patrimoniu cultural de toos y toes.
La iniciativa quier que nes feches próximes al día 8, los asturianos escriban nes redes sociales n'asturianu y faigan circular na plataforma Twitter la etiqueta #AsturiesNasturianu
Dende Iniciativa pol Asturianu manifiesten: “Con esta iniciativa pretendemos concenciar non solo a la sociedá asturiana, sinón a la española en xeneral, de la responsabilidá de toos si esta llingua morriera. Les llingües son patrimoniu cultural universal. Toos quedamos horrorizaos cuando vemos dinamitar la hestórica ciudá de Palmira, pero munchos queden entá indiferentes y faen de menos a una llingua como la nuesa”. Y añede “l'oxetivu últimu de la iniciativa ye que los asturianos nun sientan vergoña n'espresase falar o escribir n’asturianu entamando per esti Día d’ Asturies”.
Iniciativa pol Asturianu trabaya pa que la llingua asturiana, como elementu cultural ya identitariu en peligru, sobreviva, y pa que los falantes d’esti idioma, como comunidá que nun ve reconocíos los sos drechos al completu, tengan cada vegada una meyor situación, hasta algamar la plena igualdá de drechos llingüísticos, hasta que se pueda vivir n’asturianu. Y consiguir que la xente abandone los prexuicios a hacia la so propia llingua ye unu de los puntos clave d'esti procesu.
