Iniciativa pol Asturianu anima a los centros asturianos y cases d'Asturies espardíes por tol mundiu a celebrar el Día d'Asturies usando la llingua del país. Nuna carta, el vocal d'Asturies Esterior, Pablo Arce, convida a la diáspora a incluyir l'idioma nos sos actos festivos por mor d'esti día. "L'asturianu ye un patrimoniu d'Asturies del que los Centros Asturianos tenemos el deber de protexer como una más de les nueses ayalgues", señala.
L'asociación ofrez a los centros asturianos y cases d'Asturies la so collaboración desinteresada na torna al asturianu de cualesquier testu o documentu asina como pal so diseñu. Una ayuda que puede solicitase al traviés del corréu electrónicu contautu@s806295988.mialojamiento.es. "Qué meyor homenaxe podemos facer a la nuesa tierra qu'utilizar la so llingua nel so día", apunta Arce na so carta.
La organización convida también a los centros asturianos a promover l'usu de la llingua ente la diáspora con un cartelu diseñáu especialmente pa esta fecha que defende l'asturianu como "un patrimoniu de nós".
Iniciativa pol Asturianu quier aprovechar pa desear a tolos asturianos del esterior un feliz Día d'Asturies n'asturianu.
