Iniciativa pol Asturianu reclama un esfuerciu institucional y políticu pa completar el procesu d’oficialización de la toponimia tradicional d’Asturies, cuando tán a piques de cumplise 30 años de l’aprobación de la Llei d’Usu y Promoción del Asturianu.
Ayande, Cuideiru, Ibias y Navia son los cuatro conceyos que entá tienen pendiente completar el procesu d’oficialización de la so toponimia. Por ello, Iniciativa pol Asturianu fai un llamáu, al entamu del nuevu cursu políticu, a los gobiernos municipales y al Gobiernu del Principáu d’Asturies pa impulsar el diálogu y l’alcuerdu necesarios que permitan rematar esti procesu.
La organización considera fundamental completar una tarea que lleva casi tres décades contemplada na normativa asturiana. L’artículu 15 de la Llei d’Usu y Promoción del Asturianu establez que «los topónimos de la comunidad autónoma tendrán la denominación oficial en su forma tradicional» y contempla tamién la posibilidá de denominaciones billingües cuando’l topónimu tenga un usu xeneralizáu tanto na so forma tradicional como en castellanu.
Iniciativa pol Asturianu destaca, amás, que la oficialización toponímica foi históricamente un procesu capaz de xenerar consensos ente fuercies polítiques de distintu signu. Los cuatro conceyos pendientes tán actualmente gobiernaos por PSOE y PP: Ayande, Ibias y Navia tienen gobiernos del PP, mientres que Cuideiru ta gobernáu pol PSOE.
La organización recuerda que nos procesos yá completaos participaron conceyos de diferentes colores políticos —PSOE, PP, Izquierda Xunida y candidatures independientes— y que, na mayoría de los casos, los plenos municipales algamaron acuerdos unánimes alrodiu de la recuperación y oficialización de los nomes tradicionales de pueblos y aldees.
Un exemplu especialmente significativu ye’l de Xixón, que va conmemorar esti mes el 20 aniversariu de l’aprobación del so Decretu de Toponimia, con 750 referencies. L’acuerdu foi aprobáu por unanimidá nel Plenu municipal en marzu de 2006, col sofitu de PSOE, PP y Izquierda Xunida.
Iniciativa pol Asturianu considera que ye’l momentu de completar un procesu nel que yá se sumaron el 95 % de les entidaes municipales d’Asturies; en total, 74 de 78 conceyos. La presidenta de la entidá, Arantza Margolles, señala que «cumplir los 30 años de la normativa colos deberes fechos en materia toponímica sería la meyor manera de festexar esta llei».
Margolles fai tamién un llamáu al consensu ente les distintes fuercies polítiques: «Queremos llograr un alcuerdu institucional ente conceyos de diferentes colores políticos pa rematar esti procesu. Hai que recordar que la Llei d’Usu llogró un consensu mayoritariu nel Parllamentu y que foi, amás, una iniciativa llexislativa del PP. Güei queremos invocar esi mesmu alcuentru y esi consensu p’aplicar lo que recueye la llei nesta cuestión».
Iniciativa pol Asturianu considera que la oficialización de la toponimia nun tien que ser una cuestión de confrontación política, sinón d’acuerdu institucional y respetu pola denominación tradicional de los nuesos pueblos y llugares.
