Bones tardes.
Güei tamos equí xuntes por una murnia razón, la despidida d’Helena Trexu Fombella. Amiga pa munches, compañera d’activismos pa la mayoría de les persones que tamos equí, escritora almirada pa toes y madre, pa Violeta.
Ye por ello tamién, esti, un día guapu, porque axuntamos equí pa despidila, pero tamién pa face-y homenaxe. L’homenaxe a una muyer que por distintes razones xúnenos güei a toes y toos.
En nome de la familia quiero davos les gracies por tar equí nesta tarde de domingu nel que vamos facer por llevar una alcordanza guapa pa casa, la d’un llabor inmensu y comprometíu, qu’estos díes reconocíen entidaes como Iniciativa pol Asturianu, el PEN Asturianu o l’Academia de la Llingua Asturiana, asina como munchísimes persones de toa Asturies que reconocieron el so trabayu.
Foi una de les voces y de les manes que más trabayaron nes últimes décades pa la dignificación de la lliteratura asturiana, con una obra considerables, sobre manera en poesía, traducción y lliteratura infantil y xuvenil.
Helena Trexu Fombella nació en Sama (Llangréu) en 1944 y desendolcó una importante trayectoria lliteraria venceyada a la creación n’asturianu. La so obra forma parte de la hestoria recien de la lliteratura na nuesa llingua y llegó especialmente a les nueves xeneraciones al traviés de títulos infantiles y xuveniles.
Helena Trexu volvió a Asturies nos años ochenta tres un tiempu viviendo en Cataluña. Dende la so torna a Asturies implícase dafechu nel movimientu asturianista dende l’ámbitu políticu y cultural.
N’Asturies centró’l so llabor na defensa del asturianu y na creación lliteraria nesta llingua, formándose en cursos d’asturianu, onde entró en contactu con persones como Carlos Rubiera o Sabel de Fausta.
En 1999 fundó l’Asociación Cultural Grupu Epona, entidá centrada na realización de cuentacuentos y talleres infantiles impartíos n’asturianu y na edición de llibros. El trabayu dende esta organización foi inmensu y llevó a la reciella la nuesa llingua de munches maneres diferentes.
La so trayectoria nel ámbitu lliterariu inclúi una amplia producción avalada por múltiples gallardones. Tres entamar na edición col poemariu “Camientos, coses, curuxes” (de 1989), en 1991 llogró’l Premiu de Poesía de L’Entregu y en 1995 foi reconocida col Premiu de Traducción de l’Academia de la Llingua Asturiana pola adaptación al asturianu de la obra de Salvador Espriu “El caminat y el mur”.
Darréu recibió’l Premiu de Poesía Vital Aza en 2001 por “Abril” y el II Concursu de Rellatos de Muyeres del Conceyu de Llaviana por “Onde’l ríu besa la mar”, títulos dambos espublizaos pola Editorial Grupu Epona esi mesmu añu.
En 2002 llogró’l Premiu de Poesía Elvira Castañón pol poemariu “Ringleres de carbón y salitre”, editáu por VTP en 2003, sellu que tamién llanzó la so novela xuvenil “Camín davezu”, en 2005.
A lo llargo de los años siguientes amplió’l so catálogu con obres infantiles y d’investigación como “Dos histories d’animales” (Madú, 2006), “A la gueta setes na seronda” (Asturtoons, 2006), “Valores en clave femenino” (Grupu Epona, 2006) y “Mitoloxía asturiana pa rapacinos y rapacines” (Grupu Epona, 2007), asina como otres ediciones en llibros colectivos.
Nel ámbitu xuvenil, llogró’l Premiu Asturnet en 2007 por «Llara quier ser astrónoma” (espublizáu en 2011 por Grupu Epona) y el Premiu del Certamen Llectures pa rapazos de l’Academia de la Llingua Asturiana en 2008 por “Olaya n’África”. Les sos espublizaciones más recién son la importante recopilación de voces de poetes “Poética de Muyeres 2014” (Ediciones Epona, 2014), “Piedra gris con rellumos doraos” (Ediciones Epona, 2022) y la novela “Víes” (Ediciones Trabe, 2023). La editorial La Semeya tien a piques de salir la que va ser la so segunda novela, yá póstuma, “Ente muyeres”, qu’esperamos con ganes, pa tastiar el caberu títulu que mos dexó Helena.
El percorríu vital d’Helena amuesa’l so compromisu cola llignua asturiana, cola cultura y con tantes causes que reivindicaba nes lletres pero tamién nel so día a día.
Conocí a Helena va munchos años, paez mentiera, pero va cuasi un cuartu de sieglu. Conocíla na militancia compartida pol país y dende entós tuvi la suerte d’acompañala presentándo-y llibros, entrevistándola y esfrutando de tolo que facía.
Yo yera cuasi un neñu y creo que siempres lo siguí siendo pa ella. Demostrábame apreciu y ciñu siempres nes sos pallabres, alcordándose munches vegaes d’aquella primer entrevista que-y fixi n’Onda Peñes nel programa “Asina foi… el Surdimientu” y diciéndome que yera como un fíu, porque valoraba la continuidá del trabayu que facíamos les daquelles xeneraciones más moces, a les qu’agora por suerte siguen sustituyendo otres entá más moces.
Pero Helena yera tamién un muyer de carácter. Nun podemos recordala güei con honestidá ensin recordar tamién como nos riñía, como nos metía en breda cuando-y paecía necesario.
Enfadábase con nós dacuando, discutía nun taba d’alcuerdu, y yo vilo siempres como una amuesa de la capacidá d’esta muyer, que formó parte d’una xeneración na qu’a elles educábenles pa callar, pa dicir, non, valió yá, soi un muyer y voi dicir lo que me venga en gana. Un feminismu militante, valiente y que nunca se dexaba pisar y que puedo dicilo de primer mano, yera’l terror de cualquier moderador de mesa redonda o alcuentru, porque cuando Helena tenía que dicir daqué, nun duldaba en dexalo claro y nun-y importaba enfrentase a los poderes cuando yera necesario. Yera absolumenta llibre.
Helena marcha güei murnia pola situación de Palestina, pola violencia contra les muyeres ensin solucionar, y por tantes cuestiones pendientes nes sos lluches, nes nueses lluches colectives.
Marcha tamién Helena ensin poder ver la oficialidá de la so llingua, pola que tanto lluchó, pola que tanto escribió, pola que tanto se manifestó… Vivió siempres nun compromisu llingüísticu y nuna llealtá absoluta pa col asturianu. Y nesti día siento rabia porque nun pudiera ver esa oficialidá pola que tanto naguaba. Pero la so alcordanza va dexanos agora más puxu pa siguir trabayando nesta causa, porque Helena cumplió de sobra col so papel na vida, siguiendo’l filu hestóricu d’esti idioma, tresmitiendo l’asturianu a la so fía, sofitando esta causa en tolo que pudo, que foi abondo.
Pa despidime, Helena, un poema tuyu que güei nos regala la guapura de les tos pallabres:
Casina vieya
Güei valtaron la casina’l mio barriu,
La casa pequeñina acompangada d’hortensies y cales
Abangaes percima la muria, ufriendo sonrises d’arume.
Güei valtaron la casina vieya
Pa construyir viviendes faltes d’identidá,
Nuna lliturxa descomanada de formigón y lladriyu.
Güei desfízose, inda más, tradición y ñatura al empar
Y namái caltengo l’alcordanza murniosa
De la casina arrecendiendo a hortensies y cales.
Vamos echate muncho en falta, Helena.
