Iniciativa pol Asturianu cumple esti añu 15 años de trabayu en defensa del patrimoniu llingüísticu. A lo llargo d’estos años, escontra vientu y marea, tocónos llograr nuevos espacios pal idioma, convencer a nueves persones na importancia de protexer l’idioma de la vulneracion de los drechos llingüísticos en munches ocasiones.
Too ello siempres resultó un camín cuesta arriba pola ausencia d’oficialidá quedando siempres como llingua escluyida o de segunda. Esta realidá implicó durante munchos años que l’Academia de la Llingua Asturiana nun cuntase con financiación estatal, que les llingües propies d’Asturies nun pudieren tar presentes en premios lliterarios o convocatories y tamién en diferentes iniciatives llexislatives estatales como ye’l casu de la Llei Audiovisual. Tamién ocurrió que nun se podía usar la toponimia tradicional porque «l’asturianu nun yera oficial». Mesmamente, va unos díes denunciábemos l’ausencia d’obres n’asturianu na aplicación eBook porque l’asturianu -entá- nun ye oficial.
L’ausencia de la oficialidá tamién tien consecuencies qu’afecten al ámbitu llaboral, como ye’l casu de los docentes d’asturianu y d’eonaviego, obligaos a vivir na interinidá perpetua. Esta realidá xenera directamente una inestabilidá llaboral afectando a la calidá de la enseñanza porque xenera complicaciones pa la docencia de Llingua Asturiana y Lliteratura y d’Eonaviego. Al mesmu tiempu, esto impide la consolidación de carreres profesionales pa estos trabayadores, lo que crea un cuerpu de profesionales de segunda como lleven denunciando dende l’Asociación de Docentes d’Asturianu y d’Eonaviego nes sos movilizaciones estos meses.
Pero, ¿pa financiar a l’Academia de la Llingua Asturiana nos Presupuestos Xenerales del Estáu yera necesaria la oficialidá? Evidentemente non, y llogramos nel Congresu que depués de munchos años l’ALLA tuviese financiación nos PXE. Lo mesmo pasa cola Especialidá Docente d’Asturianu, el Ministeriu d’Educación, Formación Profesional y Deportes pue solucionar fácilmente esta situación qu’afecta a 300 families. La solución ye cenciella: la reforma de los Reales Decretos d’Especialidaes de Primaria, Secundaria y Escueles Oficiales d’Idiomes. Esta ye una reforma áxil que namás necesita la so aprobación nel conseyu de ministros y solucionaría la llaceriosa situación del profesoráu de les llingües propies d’Asturies.
Durante décades, la llingua asturiana sobrevivió gracies al esfuerzu silenciosu de miles de persones: families que la caltuvieron viva na so casa, escritores que la llevaron a la lliteratura contemporánea, músicos que la fixeron sonar n’escenarios de dientro y fuera del territoriu, docentes que la defendieron y la defenden nes aules y na cai como ta faciendo ADAE. L’asturianu nun llegó hasta equí por casualidá, fíxolo porque hubo una sociedá que se negó a aceptar que la so llingua fuera considerada de segunda categoría.
Evidentemente, l’asturianu nun ye llingua de segunda división. Los sos docentes tampoco. Por ello, el próximu martes 19 de mayu vamos volver a la cai p’acompañar incansablemente a l’Asociación de Docentes d’Asturianu y d’Eonaviego na Plaza d’España d’Uviéu nesta nueva movilización.
Valió yá d’escaezu y d’inacción. El profesoráu, l’alumnáu, les families y l’asignatura d’asturianu merecen igualdá y respetu. Ye’l momentu d’iguar definitivamente esta discriminación histórica cola reforma de los reales decretos mencionaos, ye lo mínimo que s’espera d’un Gobiernu progresista y comprometíu cola diversidá llingüística.
Señora Ministra d’Educación: tien nes sos manos camudar una desigualdá que s’allarga yá 41 años, pa ello, pidímos-y que les llingües d’Asturies y la situación de los sos profesores nun-y faigan ‘tolón’.
