Iniciativa pol Asturianu solicitó formalmente a l’Autoridá Portuaria de Xixón la incorporación del asturianu na nueva señalización horizontal y vertical del puertu, coincidiendo col procesu de llicitación recién anunciáu pa la renovación d’estos elementos informativos na infraestructura portuaria d’El Musel.
La organización de reivindicación llingüística considera qu’esta actuación supón una oportunidá clara pa avanzar na normalización social de la llingua asturiana, favoreciendo la so visibilidá y usu nun espaciu públicu d’especial relevancia como ye’l puertu de Xixón. Amás, recuerden qu’otros puertos del Estáu que s’alcuentren en comunidaes con llingua propia yá incorporen les sos llingües nes señalizaciones y servicios, garantizando una presencia en condiciones d’igualdá como ye’l casu de Bilbao o Barcelona.
L’asociación tamién propón que l’asturianu tea presente nel portal web de l’Autoridá Portuaria de Xixón nel momentu de la so renovación, asina como nes comunicaciones institucionales, siguiendo exemplos como’l del puertu de Bilbao, que yá cuenta con versión na so llingua propia o tamién el de Vigo que cuenta con posibilidá de consultar la web en gallegu.
Nel escritu presentáu, Iniciativa pol Asturianu recuerda que, anque l’asturianu entá nun ye oficial, ta reconocíu nel Estatutu d’Autonomía y protexíu pola Constitución española como parte del patrimoniu cultural, lo que xustifica la so promoción y usu nos ámbitos públicos y per parte de les Alministraciones Públiques.
Respecto a la toponimia, la organización incide na importancia y del imperativu llegal d’usar les formes oficiales, como “Xixón”, acordies cola normativa vixente, y señala que les alministraciones públiques tienen qu’adaptar progresivamente la so señalización a estes denominaciones, incluyendo l’Autoridá Portuaria de Xixón.
D’otramiente, Iniciativa pol Asturianu ufierta la so collaboración, xunto cola Oficina de Normalización Llingüística de Xixón, pa facilitar la implantación del idioma nes distintes actuaciones del puertu.
Finalmente, la entidá felicita a l’Autoridá Portuaria de Xixón pola incorporación reciente del asturianu y de la toponimia tradicional nel diseñu de “Xixón marineru”, obra de Juan Rubio nel dique de Santa Catalina, destacando qu’esti tipu d’iniciatives “xeneren conexión cola ciudadanía y reciben una valoración positiva per parte de la ciudadanía y visitantes”.
