“Na cabera llexislatura de Gabino de Lorenzo utilizóse l’asturianu nes fiestes del Antroxu, la Navidá y otres actividaes”
“Nun apaez nin l’asturianu nin la toponimia oficial d’Uviéu lo que supón, llamentablemente, un pasu atrás na presencia del idioma na capital”
“El Conceyu d’Uviéu nun puede quedar atrás na normalización del asturianu”
UVIÉU, 7 DE FEBRERU DE 2020. Iniciativa pol Asturianu denuncia la desapaición del asturianu nos carteles del Antroxu d’Uviéu. El presidente de la organización, Iván Llera, considera que la decisión ye “absolutamente incomprensible” y llamenta que “se dean pasos atrás na presencia y normalización del idioma cuando l’usu del asturianu nestes fiestes yá taba aceptao pola sociedá”.
Llera apuntó tamién que “la Llei d’Usu incúmplese una vegada más en varios artículos. El 15, relativu a la toponimia, y el 12 relativu a la difusión. Si el llímite na política llingüística de los partíos que gobiernen n’Uviéu ye la Llei d’Usu, ¿cómo ye posible que s’incumpla sistemáticamente?”.
Nesi sentíu, Iván Llera comentó tamién que “nun podemos permitir que se dean pasos atrás nel usu del asturianu nel Conceyu d’Uviéu. Na cabera llexislatura de Gabino de Lorenzo utilizóse l’asturianu nes fiestes del Antroxu, la Navidá y otres actividaes ensin ningún problema. ¿Por qué agora sí?”.
Llera terminó diciendo que “ye especialmente llamentable que se camude’l nome tradicional d’una fiesta d’Asturies como ye l’Antroxu, qu’usen la mayoría de los conceyos asturianos nes sos carteleríes. Esta decisión supón perder un elementu que sirve pa identificar les nueses fiestes propies y que fai marca pa Uviéu y p’Asturies.”
