La organización yá tresllado al Conseyu Asesor de la Llingua la quexa pola ausencia de la llingua asturiana
Iniciativa llamenta qu’el Conceyu Xixón desconecte del asturianu y de la toponimia nesta campaña
XIXÓN, 5 DE FEBRERU DE 2020. Iván Llera, presidente d’Iniciativa pol Asturianu, fizo unes declaraciones pa denunciar la nula presencia de la llingua asturiana na campaña “Conecta Gijón” qu’estos meses alcuéntrase presente nel Paséu de Begoña sobre l’aforru enerxéticu. El presidente comentó que “dende Iniciativa pol Asturianu llamentamos que nin l’asturianu nin la toponimia oficial tean presentes nesta campaña del Conceyu de Xixón”.
Nesi sentíu, Llera apuntó que “dende la nuesa organización yá treslladamos al Conseyu Asesor de la Llingua de Xixón, órganu nel que tenemos representación, esta quexa. Creemos que sería bien interesante qu’una campaña na cai, interactiva y con tanta visibilidá tendría que tar presente l’asturianu. L’idioma nun puede quedar solo pa cuestiones dependientes de la Conceyalía de Cultura. Como n’otres ocasiones pedimos que l’asturianu tenga una fonda presencia en tola actividá municipal en campañes de la EMA, EMULSA o de Deportes. Dende Iniciativa vamos trabayar pa insistir nesta cuestión y que seya importante na llabor de Gobiernu del Conceyu y que’l plan de Normalización insista nello”.
El presidente de la organización acabó diciendo que “ye pa nós una pena que’l Conceyu de Xixón desconecte del asturianu na campaña `Conecta Gijón`”.
