Iniciativa pol Asturianu denuncia esta situación y recuerda que la oficialidá evitaría estos casos de discriminación
UVIÉU, 21 DE XINERU DE 2020. Na mañana de güei y dientro del actu de llectura y defensa de la tesis doctoral «La llingua asturiana nel Franquismu», Inaciu Galán, autor de la investigación, denunció que presentar una tesis n’asturianu sigue suponiendo vivir situaciones de discriminación. Nel actu espresóse llamentando que «facer y defender una tesis n’asturianu sigue siendo güei un fechu non normalizáu y que xenera dificultaes a un investigador».
Asina, esplicó como tres presentar la so tesis dafechu n’asturianu, la Comisión de Doctoráu de la Facultá de Filosofía y Lletres devolvió la mesma obligando al autor a incluyir les conclusiones tamién en castellán, basándose nuna interpretación del reglamentu de doctoráu abusiva y que fai que se trate al asturianu de forma discriminatoria, obligando a les persones que faen una tesis n’asturianu a pidir permisu pa facelo y a incluyir partes de la mesma en castellán.
L’investigador nun tuvo otra que pa consiguir que se-y aceptara la tesis, y tres recibila de vuelta, qu’incluyir «por imperativu llegal» el testu en castellán acompañando al orixinal asturianu*. Otros estudiantes pasaron tamién pela mesma situación y punxéronse en comunicación con Iniciativa pol Asturianu pa denuncialo. «Ye llamentable que cada pasu que queremos dar pa vivir con normalidá n’asturianu seya un problema pa les persones que queremos usar esti idioma. Nun pidimos más que poder vivir colos mesmos drechos que les persones que quieren espresase en castellán», esplicó Galán esta mañana.
Iniciativa pol Asturianu quier sumase a la denuncia d’esta situación, yá que ven esta decisión como contraria a los Estatutos de la Universidá, pues la norma interna de la Universidá d’Uviéu recueye que «naide podrá ser discrimináu pol usu del asturianu». Nesi sentíu, dende la organización tamién recuerden que la Llei 1/ /1998, de 23 de marzu, d’Usu y Promoción del Asturianu permite a la ciudadanía dirixise de manera llibre a l’alministración utilizando la llingua asturiana.
Pa la entidá, esta situación implica una vegada más qu’una persona que de manera llibre y autónoma quier facer usu del asturianu na so vida nun puede facelo porque los drechos llingüísticos nun s’alcuentren recoyíos la llexislación vixente. Esto ye que por nun haber oficialidá del asturianu hai persones que nun tienen los sos drechos reconocíos nin pueden facer usu del idioma de manera llibre y voluntaria.
Dende Iniciativa pol Asturianu anímase a los partíos políticos a facer una reflexón sobre esta cuestión yá que ta claro qu’hai una situación de desiguadá de drechos. Les persones que quieren presentar la tesis en castellán pueden facelo, n’asturianu han facelo en peores circunstancies, obligaos a presentar doble versión y facer un doble esfuerciu. La organización recuerda amás que sin oficialidá nun hai una garantía real d’igualdá entre los y les falantes de diferentes llingües n’Asturies.
A la Universidá d’Uviéu pidímos-y un cambiu nel Reglamentu que garantice que puedan presentase les tesis y cualquier trabayu n’asturianu n’igualdá de condiciones a la presentación en castellán. La esperiencia de les tesis n’asturianu remóntase yá a los años ochenta y ye’l momentu de da-y un encaxe llegal definitivu.
Pa terminar, dende la organización queremos agradecer la valentía y el trabayu del nuesu ex presidente, Inaciu Galán, pol bon trabayu científicu d’estudiu del asturianu nesta etapa hestórica y amás del ánimu por facelo n’asturianu pese a les dificultaes.
