“Confírmase, una vegada más, que l’usu de la llingua asturiana per parte de les empreses resulta positivo porque permite conectar d’una manera más direuta colos veceros”

Pa la organización ye una bona noticia comprobar qu’empreses de diferentes sectores productivos utilicen l’asturianu na so actividá comercial y nes campañes publicitaries

XIXÓN, 15 DE XINERU DE 2020. Iniciativa pol Asturianu quier felicitar a Danone pol usu del asturianu na publicidá de los sos productos en varios centros comerciales d’Asturies. Nesi sentíu, Inaciu Iglesias, vocal d’Empresariáu d’Iniciativa pol Asturianu, comentó que “celebramos que la llingua asturiana tea presente nel marketing d’una empresa tan importante nel sector alimentariu pola visibilidá que-y da al idioma”.

Iglesias apuntó que “confírmase, una vegada más, que l’usu de la llingua asturiana per porte de les empreses resulta positivo porque permite conectar d’una manera más direuta colos veceros”.

El vocal d’empresariáu añadió que “ye una bona noticia comprobar qu’empreses de diferentes sectores productivos utilicen l’asturianu na so actividá comercial y nes campañes publicitaries. Ye mui importante porque tamién supón normalizar l’idioma”.

Inaciu Iglesias dixo tamién que “Iniciativa pol Asturianu lleva años insistiendo na importancia de la llingua asturiana nel ámbitu empresarial. Porque l’asturianu ye un elementu de creación empresarial y, polo tanto, de riqueza. Y ye qu’amás la llingua asturiana puede ser un elementu de diferenciación y qu’aporta valor añadíu a los productos y servicios qu’ufierten les empreses».

Iglesias acabó diciendo que “dende Iniciativa pol Asturianu felicitamos y celebramos l’usu del asturianu per parte de Danone y reconocemos esi esfuerciu d’animase a utilizar la nuesa llingua”.