Iniciativa pol Asturianu respondió a la so petición d’ayuda y collaboró nel doblaxe y sotituláu n’asturianu del so programa de cocina
Chef Rafi, un blogueru procedente de los Estaos Xuníos y de namás diez años, pertenez a la xeneración que nació con internet nel so día a día. Con ocho años quixo facer una canal de Youtube y el so pá ayudólu. Agora ye unu de los cocineros más xóvenes del mundu na rede.
Una de les peculiaridaes de la so canal ye que fai recetes del mundu enteru y pide collaboración de falantes y organizaciones en caún de los llugares del mundu pa doblar y sotitular el videu de la receta na llingua orixinal de la cultura onde se fai esi platu.
Agora ta acabante asoleyar na rede un videu nel que prepara la más conocida de les recetes asturianes, la fabada. Iniciativa pol Asturianu collaboró con esi youtuber cola torna y doblaxe del videu, qu’agora permite ver a esti neñu norteamericanu cocinando fabada asturiana n’inglés y n’asturianu, con paisaxes de cuatro estaos del país de fondu.
Chef Rafi tien recetes en decenes de llingües del mundu enteru, ente les que tán la llingua materna de la so güela, que ye de Filipines, el waray waray. Esta foi la primer esperiencia, dempués vinieron otres munches llingües minorizaes del país, y darréu otres llingües del mundu enteru como’l navayu, luxemburgués, napolitanu, portugués, hawaianu, irlandés, chechu, catalán, vascu, galés, croata, etc. Aprovecha los viaxes cola so familia pa grabar imáxenes perdayuri, que dempués usa pal so programa en Youtube.
El videu n’asturianu pue vese equí:
